Am wakken i d-yettawi urar n ddabex n uḍar lferḥ, i d-yettawi daɣ reffu. Amek ihi i yezmer ugdud azzayri ad yettu tamxixt n Marrakech ? Aṭas i newwet agerz deg yiberdan mi akken, Ziani d yimeddukkal-is, jebban tarbeɛt taɣelnawt ɣer uḥric n umaḍal, mbeɛd 24 n yiseggasen. Amek i zemren yilmeẓyen ad ttun tameɣra n Oum Derman, mi akken daɣ Antar Yahia iɣebba asirem n yimaṣriyen ?
Ziɣ, waqila teɣreq yis-neɣ targit, am wakken i qqaren at zik : « Aṭas i yezha lexrif, di ccetwa yedda ɛeryan. » Ɣer wayen-nni i nessaweḍ ass-a, imi anejmuɛ aneggaru n tesqamut n Raouraoua iwekked-d aya, iban-d s wudem i s-fkan widen yesnen ddabex n uḍar acḥal-aya. Di lawan-nni, yuzzel wawal ɣef yiwen am Mahmoud Guendouz d kra n yinaddalen i d-yennan tarbeɛt yecban ta ur tezmir ad truḥ mebɛid. Ulac amek ur nnin fell-asen wiyaḍ almi nwan d akken d tismin i ten-izedɣen. Maca, ass-a, newweḍ-d s imeslayen nsen. Tura, yal wa aniwa iwumi ara yesbibb taluft n lexṣara. Di tmurt nneɣ, d asleɣmay kan i yettruḥun d asfel. Ad as-cuffen aqendur di tazwara, kra n wagguren kan, ad yeffeɣ si tzulixt. Ɣef leḥsab n waṭas n yimusnawen n waddal, ur yezmir Benchikha ad yefru weḥdes aṭṭan izedɣen aḥric-a di Lezzayer. D tasertit n waddal i yuḍnen, iwakken ad teḥlu, ilaq ad tbeddel aqerru.
Rabah Saâdane d yiwen seg wid ikesben tamusni di ddabex n uḍar, imi mačči yurar, yeɣra. D atiknisyan yuklalen leqder. Yexdem ahat ayen iwumi yezmer, ssulin-t ɣer yigenwan, din din ɣeḍlent-id ɣef uqerruy. Ass-a, d Abdelhak Benchikha i ixelṣen tineggura. Ma d tajmaɛt isedduyen urar n ddabex n uḍar (FAF) tessufeɣ-d akken yiwen n rrabul anda i tt-mazal tessedduy tasertit-is, zun akken tebɣa ad d-tawi udem amaynut. « Ad d-nessufeɣ ajdid seg uqdim ! » Akka i yebɣan. Ihi, ɣef leḥsab n wayen i d-yefɣen seg temlilit, imḍebber amezwaru M.Raouraoua yessutur-d smaḥ seg yizzayriyen ɣef ayen akka yeḍran di Marrakech.
Am wakken daɣ i d-yenna : « ad rreɣ tajmilt i yimyurar n terbaɛt taɣelnawt i d-yewwin lferḥ ɣer wulawen n yizzayriyen. » Seg tama nniḍen, tasqamut-a thegga-d yiwen n wahil ara tesseddu deg wussan i d-iteddun anda ara tɛiwed tamuɣli i usebded n wid ara yeddun deg lecɣal n terbaɣt taɣelnawt. Imi tadrimt mačči d tin iseg teccektay tejmaɛt-agi, d asureg, ata-n ad d-tili lemcawra wessiɛen. Aya, s teɣri ara d-yilin akk i wid yebɣan ad ttikkin, ad ssiwḍen ikaramen nsen, segmi ara d-iban usleɣmay, izemren i waya, yernu, waqila, seg tmurt n lberrani. Lḥasun, ahil mačči d win i ixussen, maca tigrat-is wissen amek ?
Imejjayen qqaren-d d akken mi ara d-yennulfu kra n waṭṭan, ilaq ad t-iqsed umdan s aẓar iwakken ur yettefrurux ara. Ayadra, ma ilaq ad d-yeḍru waya ɣef waddal di tmurt nneɣ ?
Sylia. M