Asebded-a yesεan azal d ameqṛan i t-yufan d yiwen n uqcic S.Bilal n taddart n Sidi Lḥaǧ Ḥsiyen(Semεun) mi yella ileqqeḍ azemmur aseggas iεeddan. At taddart ḥerrzen fell-as, ssawlen ladγa i yimusnawen terza temsalt akken ad ad t-ẓren yerna ad xedmen tizrawin-nsen. Dduṛt yezrin, teεṛeḍ-d tdukla Ccix Ṭaher al-Ǧazairi Asemεuni Aweγlis i d-ilulen di taddart-a i d-nebder s lemεawna n tdukla GEHIMAB, amusnaw ameqran di tesnaqburt(archèologie), mass lepṛufisur Jean Pierre Laporte, akken ad iẓer asebded-a, yerna yefka-d asarag γef usentel : « isebdad ilibiyen imaziγen n tmurt n Leqbayel, les stèles lybico-berbères de Kabylie ». Deg usarag-is, mass Jean Pierre Laporte yemmeslay-d i wat taddart d yinebgawen-nsen i d-yusan s waṭas seg tuddar n tγiwant n Chemini d lεerc nat Weγlis, γef tixuṭṭert i tesεa tceqquft-a tarekyulujit ladγa deg ayen yeεnan anadi γef umezruy n yimaziγen, yerna daγen yesmekta-ten-id γef yisebdad-nniḍen i d-ibanen deg aṭas n temnaḍin n tmurt n Leqbayel.
Akken ad nesmekti, asebded-a amaynut i d-yettwakeflen, yugar di tjumma win n Ubizar, fell-as yettwajerred wunuγ n umnay, deg tama tazelmaḍt yura s yisekkilen n tlibit(tifinaγ n zik). – Mazal ad nuγal s ttfaṣil γef yisalli-ya deg teẓrigin-nneγ i d-iteddun.
Mokrane Chikhi