Tamehla n yedles n n Tizi-Wezzu akk d lemεawna n sindika n yinaẓuren n Tizi-Wezzu, sudsen-d ddurt-agi yezrin deg wass n 08 yunyu asmekti n wass aγelnaw n unaẓur deg wexxam n yedles n Lmulud At Mεemmar s teγezi n 3 n wussan. Asmekti-agi yella-d d tajmilt i 04 n yinaẓuren : Oukil Amar, Amar Seghir, Ameziane Mohand Ameziane d Belkhir Mohand Akli.
Γas akken llan wid yerza waṭan, s tebγest ussan-d γer usmekti γer tejmilt-agi i yuγalen i 04 n yinaẓuren iqburen i d-teffka temnaḍt n leqbayel,ger-assen inaẓuren iqburen am Dda Rabah (Taleb Rabah), Rabah Oufarhat i yellan d aselway n sindika n yinaẓuren n temnaḍt n Tizi-Wezzu, Taleb Tahar , Chemoun…atg.
Ger 04 n yinaẓuren-agi iwmi tuγal tejmilt, yiwen segsen tewwi-t tmettant aseggas yezrin, yemmut ass n 29 yunyu 2010 di taddart-is At Umezyan di tama n Tizi-Wezzu. ger tezlatin yecna « Sser n teqbayliyin, aṭṭir-iw amsafer, Ala abeḥri n tmurt-iw, Win yebγan zzin..atg ».
Ma yella d Dda Amar Seghir n taddart n Talla n Tazert taγiwant n yibudraren ur d-yussi ara ula d netta γer tejmilt-agi is-yuγalen acku yeṭṭef-it waṭan deg ussu, nessaram-as tujya, ger tezlatin yecna » Lfiraq ay atma yuεar, yelli-s n Jerjer meskint, Sllam Llah fell-awen…at ». Belkhir Mohand Akli n temnaḍt n Boudjima yussa-d γas akken ur yezmir ara, maca yenna » Ass-a d ass yiffen akk ussan », ger tezlatin yecna » Tumεint n tfetusin, Uffiγ-tt di tesga teqqim, Sid Ahmed Abudali…atg ». Dda Amar » Oukil Amar », γas akken yelḥa deg leεmer yettban-d am yilemẓi, mazal lbaraka, yemekta-d tiqdimin, yecna-d tizlitt-is mucaεen Chemin difir bu wurfan, syen yecna-d tizlitt n Farid Ali » Ayemma εzizen ur ttru » d tajmilt i yimeγrasen n tegrewla tazzayrit.
Awal yuγal i Dda Rabah (Taleb Rabah), anda yerra tajmilt i yinaẓuren iγ-yejjan am Ahcene Mezani, Hnifa, Farid ALI.
Rabah Ouferhat, aselway n sindika n yinaẓuren n temnaḍt n T-izi-Wezzu, yerra tajmilt i yinaẓuren merra, syen yessuter tifrat i wugguren yettidir unaẓur syen yecna-d tizlitt-is mucaεen » A tala illuγen d acu i kem-yuγen? « . Akka, yal anaẓur yuklal leqdar, tajmilt tεedda i tegnatin yelhan aṭas.
Di tegnitt am tagi issulef fell-aγ ad-nebder anaẓur xarṣsum stewzel n wawal acku aken nebγu newwi-d awal fell-as, ur nezmir ara ad d-nezzi yakk γef wayen yexdem. Taẓuri d lebḥer lqayen, d lebḥer wessiεen ur yezmir yiwen ad-tyelḥeq akken yebγa.
Taẓuri d tilleli, ur tcudd ara γer yiwen wemḍiq, tleḥḥu, tessuruf tilisa, trezzef si wa γer wa, ur tkeffu ara deg-s lγella, ur tesεi-ara taggara. Dima yettlalay-d umaynut γef umaynut.
Islam Bessaci