Anaẓur n tmurt n Marikan Peter Falk, i yettwasnen deg uḥric n ssinima s yissem n lanspiktur columbo ladɣa deg yisura n tilibizyu, yewweḍ anda ara naweḍ u di leɛmeṛ-is 83 n yiseggasen, ɣef akken i yenna yiwen seg yiɛeggalen n twacult-is i umaṭṭaf n kalifuṛniya (KNX) deg ass n lǧemɛa 24 di yunyu. Yuɣ lḥal Columbo i imucaɛen deg tẓuri tis sebɛa, yuḍen i waṭas n yiseggasen-aya s tidderwect maca yella seddaw n leɛnaya n tmeṭṭut-is Shera Falk i yellan di lḥeṛma-s i wazal n 34 n yiseggasen. Peter Falk iqeṣṣeṛ-d d « lyuṭna Columbo » deg azal n 70 n yisura ger yiseggasen n 1968 d 2003, d acu kan yesɛa amezruy uqbel annect-a acku yettwafren snat n tikal di temzizelt n Uskaṛ deg yiseggasen n 1961 d 1962. Di taggara ad nini dakken anaẓur-agi ilul deg cṭember 1927 di New York, yuɣal d bu yiwet n tiṭ (yedderɣel) segmi i t-iḥuza waṭṭan n lkunṣir mi yella di leɛmeṛ-is tlata n yiseggasen, yekcem ɣer waxxam n tilibizyu deg aseggas n 1957 mbeɛd amecwaṛ igerrzen deg umezgun. S wakka Columbo i yettwasnen s tenfalit : « Bɣiɣ kan ad k-d-segriɣ awal… » ( just, one last thing…) neɣ ( juste, une dernière chose…), yessegra-yaɣ-d aṭas n yisura i yessedhuyen ar ass-a d wussan.
Farid Lahouari