Seg yisefra at zik, seg yinzan, si ṣṣut n yemma-s i t-yezzuznen d lesnin, igmer-d aḥiḥa, igmer-d tabuḥcict am zun d rrɛud imi ara terɛed… Taqbaylit d asifi, yewwi-tt deg wul, aḍar iteddu s aẓar… Icennu ayen akken yeggunin tidet. Amezruy n Lezzayer yerra udabu di tekwatin n lbaḍna, yufa-yas abrid s tutlayin am yemdanen . D aḥaruq ɣef tmeslayt-is I d-yeṭṭeḍ am yizir n uyefki n yemma-s. Yečča-t wul-is ɣef tmurt-is, ɣef iẓuran-is, ɣef timmuzɣa, ɣef llakul n Lezzayer n wass-a. Ccnawi-s d tisuqas n lesnin d wayen iɛeddan fell-as: qerriḥit, ssendafent, ssengarent…iɛemmed-itent am jenjaṛ I tiṭ..Xas tru ad tesseḥlu leǧruḥ-is.. Yal tikelt deg-I yečča rrṣaṣ ṣṣura-s, sellkent-id wid-is, wid-nni yumnen s umennuɣ n MEƐTUB Lwennas..Imi ara yebbaɛzaq , yettuɣal-d ṣṣut-is deg yidurar n Ǧerǧaṛ, d idurar I d leɛmer-is. Tikwal yettmenni-d tamurt, maɛna Tamara terra-t akin I tlisa n Lezzayer..lmut d acelqef, lmut tegguni, yiwen wass ad t-id-tɣafer. Yebɣa ad Yidir, ad idirent taktiwin-is, ad tidir tmuɣli-s ɣef yiman-is, ɣef tmurt-is..Amer ad as-yiɣzif leɛmer ad d-yini I t-yerḥan: ɣef ineɣmasen yebran I ṭṭbel deg waman, ɣef llakul I d-ittṛebbin deg qebbaḍ leṛwaḥ, ɣef tmeṭṭut, ɣef tugdut yerran leḥyuḍ d taqubbett.. Yugad ad nekkaw am ceṭṭiḍ, ad nettu ansi d-nɛedda…Cfut di terga yeɣli, ass-a, di tala n Bunan, d anza-s I d-yessawlen..Ay ajeǧǧig n usuki, win yettun ad t-id-nesmekti, ay abeḥri……………….
Zira