Nuja ideflawen(Schneewittchen/Blache-Neige) d yiwet ger tmucuha n watmaten Grimm d-yesmuḥyet Sεid At Mεemmer si tlalmanit. Ukkuẓ(4) gar-asent tmucuha-yagi, asefru yakkd tezlit i warrac, la ten-tkelles tnaẓurt Tatie Tamcumt, a d-yeffeγ usidi-nsen(t) di taggara unebdu-yagi n 2011.
“ Yiwen wass ger wussan n tmeddurt, akken tzeggen tegrest, adfel d lawan-is, dγa yerres-as i tyita akken iwata. Yettṣubbu-d seg igenni am iferrawen n yefrax d-yeddem waḍu.
Tamurt akk tγumm-itt temlel, ihi tecbeḥ jillul, millul, amalu d asammer.
Yiwet tgellidt tbedd γef ṭṭaq bu yiran n wesγar aberkan, tkessu tacacit, tessakad deg wedfel mi akken la d-yekkat.
Ur tfaq ara d yiman-is, almi tt-yuker ufus-is, tessenta tisegnit deg uḍad-is, uragen-t-d seg-s kraḍ(3) tmiqwa idammen, yessasen seg-sent wedfel-nni.
Seg wakken tzad ccbaḥa n tezweγ idammen-nni sufella n wedfel, tenna-yas i wul-is:
Ah, a tin ara yesεun yelli-s, ad tili d tacebḥant am wedfel, d tazeggaγt am idammen, daγen ad tettirriq deg-s tebrek am yiran n ṭṭaq-agi!
Daγnettat ur terni ara aṭas, teffeγ targit-is, terna γur-s teqcict.
D tamellalt am wedfel, tezweγ-is am idammen, acebbub-is yecceεciε am tebrek n wesγar n ṭṭaq-nni iγef tella tbedd, mi akken tessaram a d-yeḍru wayen d as-yuγalen imiren d tilawt.
Seg wakken tesdukel akk teqcict annecten n sser yakkd ccbaḥa, terna tettak anzi γer Nuja uteryel, ssawalen-as Nuja ideflawen, d wagi i d azarisem d as-fernen.
Γas ulamma yeffeγ usirem n tgellidt, maca, yelli-s-nni tlul-d, nettat tewweḍ sanda ara naweḍ, imiren kan, zdeffir n tadist d-turew. D timennifrit i d talaxert, d talaxert i d timennifrit.
Agellid yerna ahat kra useggas kan, yewwi-d tameṭṭut-nniḍen.
D tameṭṭut taḥuskant, ala win ara s-yinin, tif aggur n tziri di ccbaḥa.
…yettkemmil…