I tikkelt tamezwarut deg umezruy n tmurt nneɣ ssawḍen yigemmaḍ n ukayaḍ n le Bac ɣer yiwen n uswir yessewhamen, neɣ balak yessefraḥen, mačči d kra. Ugar n 80 % i d-tegmer twilayt n Tizi Ouzou, ayen i tt-yeǧǧan ad teṭṭef amḍiq amezwaru.
S wannuz ! awi yufan, tamurt ad teɛmer s wid yeɣran, ma d lebɣi s uswir yettuqadaren.
Deg Tubiret, 57,02 % i irebḥen aseggas-a. Ɣef leḥsab n yisallen i aɣ-d-yewwḍen, igemmaḍ-a zaden s 2% ɣef useggas yezrin. Ula d tizmilin wwḍent ɣer 18,19 / 20 i d-iḥella yiwen n unelmad deg tesnawit n Lakhdaria.
Lezzayer tamaneɣt teṭṭef amḍiq wis-3 deffir Mɛesker ! Constantine neɣ ahat Cirta d tis 5. Nezmer kan ad nesserbeḥ i yinelmaden nneɣ daɣ ad nefreḥ yid-sen. D acu kan, wissen ma ḥsan acu i ten-yettrajun deg tesdawit. Yenna-yas umɣar azemni i winna akken i d-yusan ɣur-s ad as-yerqu i tɛekkazt-is iwakken ad yewwet widak i t-yetteḥqaren: “taɛekkazt ad ak-tt-rquɣ, ma ad as-ternuḍ azeḥlelli.”
Deg tallit ideg i nella tura, asdawan mačči kan d turagt-nni i d-yewwi deg wayen yefren, maca liseɛ di tmusni n wayen yerzan tilufa nniḍen tetturaju seg-s. Imawlan, lǧiran d yimdanen akken ma llan ttmuqulen asdawan s yiwet n tiṭ n ṭṭmeɛ ahat ad d-ssukksen seg-s kra n tmusniwin, iwellihen…D lɛib ma nessexsi tirgit-agi yessewwen taswin n yirgazen d tulawin ur nessaweḍ ara ad kecmen lakul.
Mi tendeh tefsut n Waɛraben, aselway n tmurt nneɣ iger-d s annar yiwet n tmuɣli n uɛiwed n kra akken n lecɣal.
ihi, aɛiwed-agi n tmuɣli yusa-d deg lawan n ubeggen n yigemmaḍ n le Bac.
Aseqsi i iceɣben allaɣ n yimdanen d akken ayadra igemmaḍ-agi d wid i d-ibeggnen s wudem yeṣfan abeddel i d-yellan deg uḥric n leqraya di tmurt nneɣ ?
Aneɣlaf n usegmi s timmad-is yenna-d yakan aɛiwed n tmuɣli i nexdem deg unnar yefka-d igumma-s tikkelt-a, imi nessaweḍ ɣer yigemmad-a.
Seg tama-s, win yettmeslayen s yisem n yiselmaden n tesnawiyin n tmaneɣt, yugi ad yamen s yigemmaḍ-agi, imi yenna-d d akken ɣas ulamma rebḥen s waṭas tikkelt-a, maca ad d-nemmager ɣer zdat tilufa, acku aswir mazal-it ixus.
ad d-nin kan, tallit-a tamaynut, ma ad tili dɣa s wudem unṣib, mebla ccekk ad tbeddel tteswira n tmurt ladɣa ɣer berra anda yegguma ad yettuqader uswir n usdawan azzayri.
Sylia. M