Nuja ideflawen(Schneewittchen/Blache-Neige) d yiwet ger tmucuha n watmaten Grimm d-yesmuḥyet Sεid At Mεemmer si tlalmanit. Ukkuẓ(4) gar-asent tmucuha-yagi, asefru yakkd tezlit i warrac, la ten-tkelles tnaẓurt Tatie Tamcumt, a d-yeffeγ usidi-nsen(t) di taggara unebdu-yagi n 2011.
…Seg wakken izad deg-s wayen izaden, yessekcem-as s ul-is tismin tt-yerran tettagad ad tt-tif kra n tayeḍ.
Γur-s yiwen lemri bu wazal ameqqran, igerrez nezzeh, tbedd zdat-as, testeqsa-t:
“Ini-d ini-d a lemri
Deg idurar, illel neγ di tniri
Di tγerγert neγ deg igenni
Tella tmeṭṭut, aggur neγ itri
I d iyi-yugaren di ccbaḥa?”
Yerra-yas-d lemri:
“Di tunṭicin igenwan a massa
Ulac tiḥḥerci n Ğeḥḥa
Akken telliḍ d tagellidt ass-a
I telliḍ daγen d tagellidt n ccbaḥa”
Dγa yeffeγ-itt unezgum, yeḍṣa wudem-is, yecreh wul-is, acku teẓra d tidet i d as-d-yessawel lemri.
Nuja ideflawen simmal tettimγur tettnerni, yettfukti sser-is am uεeqqa n yired.
Asmi temmed sa(7) iseggasen, tuγal amzun d nettat i d tafat, ulamek akk tt-tif tmeṭṭut n baba-s, acku ulac akk ccbaḥa yugaren neγ xerṣum yettaken anzi s ayla-s.
Asmi tules tgellidt asteqsi i lemri:
“Ini-d ini-d a lemri
Deg idurar, illel neγ di tniri
Di tγerγert neγ deg igenni
Tella tmeṭṭut, aggur neγ itri
I d iyi-yugaren di ccbaḥa?”
Yerra-yas lemri:
“A tageldit n tidet d wulawen
Γur-m ad iyi-tγileḍ riγ ad am-ssaliγ asawen
Si ccbaḥa-m taḥuskant ifadden n tilawin akk kkawen
Maca, tif-ikem aṭas aṭas Nuja ideflawen”
Tewwet tgellidt tamcumt γef uqerru-s, ur tufi ara. Udem-is amzun yuli-t sawraγ si tismin. Si tegnit n yimiren d afella, yal mi ara ṭṭṛeḍqent wallen-is di Nuja ideflawen, tḍerru-yas am wemdan yettwalin tamettant zdat-s. Akasan-is mgal taqcict taḥuskant yettiγzif lqedd-is deg ul-is, yetteddu ad yagar yal tazdayt yellan.
Daγnettat teqqel talwit tγunza-tt seg wannecten.
Asmi d as-tewweḍ tfidi s iγess, tenna-yas i uṣeggad-nsen:
“Mi ara teffγeḍ ticki γer tẓegwa, glu yid-k s teqcic ahin, bren-as meqqar tiyersi, anida ara tt-ččen wucannen, maca, ur tettuy-ara, azu-tt, tekkseḍ-as-d tasa-s, awi-itt-id d tazegzawt, akken ad ẓre&gamma,; d tidet tekkseḍ buḥbel-is!”
Aṣeggad yekna i uqerru-s zdat tegellidt, yezzuγer Nuja ideflawen seg ufus, yeskerker-itt sennig wul-is.
Wwḍen γer tlemmast n teẓgi, yessufeγ-d ajenwi-s s tergigit d wallen-is yemdel, terna tidi tcucef-as akk i wudem-is, dγa tenna-yas Nuja ideflawen:
« Nnaγ ay aṣeggad ttxilek, anef-iyi ad aγeγ abrid tuγ d teryel di teẓegi!
Iḥeqqa, tessneḍ tizlit-nni “Tibartin” umedyaz ? Yenna-yas di tebrat tis-snat:
Ad leḥḥuγ alamma wwḍe&gamma,; wissen sani?
Ula d nekk ad leḥḥuγ war tuγalin γer zdeffir, maεεac ad berneγ s axxam! ».
Segmi d as-tegzem tasa-s i wergaz yerna ur yezmir ara ad tt-yebbi ula d ttubbya yiwet tucbiḥt am tinna, yenna-yas:
Aha γiwel ihi, ddu d uḍar-im, aha!
Azzel a tameγbunt-iw, azzel, ur kem-id-yettaf ara uzekka, deg iḍ-agi ad kem-ččen wuccanen d imensi a tageswaḥt!
…yettkemmil…