Nuja ideflawen(Schneewittchen/Blache-Neige) d yiwet ger tmucuha n watmaten Grimm d-yesmuḥyet Sεid At Mεemmer si tlalmanit. Ukkuẓ(4) gar-asent tmucuha-yagi, asefru yakkd tezlit i warrac, la ten-tkelles tnaẓurt Tatie Tamcumt, a d-yeffeγ usidi-nsen(t) di taggara unebdu-yagi n 2011.
….Yerra-d nnehta, imi mačči d netta i tt-yenγan yerna din din iḍegger tiṭ-is s agemmaḍ, iwala ilef amecṭuḥ yessers-d i uqamum-is, yerra-d d akessar. Yewwit-id di nnical n lfuci-s, yenfeḍ-it din!!! Yewweḍ γur-s, yekkes-as-d tasa-s, dγa d tin i d as yewwi i tgellidt deg wadeg n tasa n Nuja ideflawen. Nettat tessuter deg iqeddacen-is, nawlen-as-tt-id d tamerγant, tekkes-as yes-s temcumt talaba i yimi-s, tγil d tidet, tečča tasa n terbibt-is. Taqcict tageswaḥt teḍra-yas am tin ikecmen εemrayen, si tugdi swayes tt-teṭṭef tkekkuct, d-as-yerran tuγmas-is kkatent am teryacin n tsirt mi ara teẓẓaḍ, ur tecfi ansi d-tekka, ur teẓri sani tteddu.
« Lxuf yurew-d tirrugza, tirrugza teγleb-itent akk ».
i d imeslayen iwulmen nezzeh, ad ten-yesseqdec wemdan, akken a d-yessegzu amek tella tebγest-nni tt-ikecmen imiren, tin swayes tezger s tazzla tiẓegwa, idurar d tγaltin ideg zgan lewḥuc ttneggezin zdat wallen-is ẓelmeḍ yeffes, maca, anzaḍ ucebbub-is mačči suman-t. Tuzzel ugar n wayen iwumi zemren iḍarren-is. Teγli-d kan tmeddit, temlal-d yiwen waxxam d amecṭuḥ, dγa tedderbez γur-s, tekcem akken ad tesgunfu acemma. Tiγawsiwin-nni yakk yellan deg wexxam-nni, tufa-tent meẓẓiyit maḍi, maca, gerrzent, ṣeggment , zeddigit akk. Ur fessus ara γef wemdan a d-yaf awalen iwulmen, akken a d-yessegzu d acu-tt akk ddunit-nni.
Di tlemmast n tγerγert tella cwiṭ n d ṭṭabla iγef rrsent sa (7) tḍebsiyin timecṭuḥin, yal taḍebsit yella kra uwezwaz n lmus γef tama-s tayeffust, tifreciḍt m tduḍac tituṭaḥin γef tama-s tazelmaḍt, zdat 7 lemwas-nni, yal yiwen ters zdat-s tfenğalt. Γer ccuka n texxamt, εeğğrent daγen 7 temṭerḥin n tguni, ta γer tama n tayeḍ, γummen-tent llidrat ticebḥanin am wedfel. Seg wakken tjaf Nuja ideflawen si laẓ yerna yekkaw yimi-s si fad, tenγeb-d am wefrux si yal taḍebsit kra n wučči, tebbi-d ciṭiṭuḥ kan akka si yal tiḥdert n weγrum terna tejγem si yal d tafenğalt tiqit n tissit. Ur tebγi ara ad tečč neγ ad tsew i yiwen kan seg imawlan n wexxam kra yellan d ayla-s. Σeyyu daγen ur yezgil ara taqcict d-icergen tiẓegwa s tazzla, maca, tameṭṛeḥt ideg tekker ad tessers iγsan-is, ad tt-taf ur d as-d-tettqidi ara, ta wazzilet, tayeḍ γezzifet, almi tewweḍ γer tneggarut i tufa lqis-is, dγa tenfeḍ kan iman-is deg-s, din din tuker-itt tiṭ-is, teṭṭeṣ. Akken d-yeγli yiḍ, nnejmaεen-d imezdaγ n tnezduγt-nni seg usekfel n nnḥas, lfeṭṭa d wuraγ deg wedrar s axxam. A ziγ nutni d sa(7) Iymuyuden ay llan, d ikerdacen akk, aγezzfan deg-sen ad as-d-yaweḍ i Butef γer timiḍt.
yettkemmil…