Leḥrir axuxi yeqqim d asemmaḍ, yedda akken ddan waman, aman zeddigen.. Deg yiḍ, i tziri d yetran, yewwi abrid ur yewwi yiwen, am zun d aɣrib, abrid yewwi d amaynut. Ul-is iɛelleq am ugazu n tẓurin. Yenwa mazal lḥal netta d win ɛzizen ad yeqqim, yeqqel-as yiṭij d lɛica, faruq yusa-d ur yeɛlim… axxam yerreqreq am zun d tameɣra, tameɣra melba lḥenni. D tagnit n ddiq ɣef kra, d tin n lisaɛ ɣef kra nniḍen. Teẓẓel di tesga am wakken ara teẓẓel ɣef waman n leḥlu ara yeggani ubeḥri n tmeddit, deg-s ad yettawi ad yettarra, ad as-icennu izlan n ibaḍniyen. Ass-agi d ass asaɛdi, zzin-as-d leḥbab d tirni, wid-nni tectaq di tizi n lɣila, lewqat ineggura d afaṛes! Ɣef ṭṭaq-nni icebbeḥ leḥrir azeggaɣ yers-d ṭṭir d amellal, ad yawi tibaratin n tsiswa yezzan, tibaratin n wulawen leqqaqen, s axxam n bab-as ad imerraḥ, acu I s-texdem I gma-s, di lɛid ur tt-id-yessefṛaḥ? Deg wexxam aṣemmaḍ, yeɣli-d rrihban, teccarew ṣṣura mi bdant adekkaṛ, tiṭ tenɣel ɣef wid tḥemmel,aḍu n leḥbab ur iban, ur ttɛawaden timeẓra, ala win yurgan lemnam. Tamuɣli taneggarut tessufsus taɛkemt, tettekkes lxuf, tettṛuz cckal, tettarra-d sser ɣer wulawen n yeḥbiben. Tamuɣli taneggarut tessendaf leǧruḥ, tessakay-d leṛwaḥ, tessendekwal, temmal abrid n liser. Areffud s lemḥadra, ṛṛuḥ-is iɛelleq am ugazu n ttmaṛ, ifassen wa deg wa, abrid d amellal… yerra-tt wemnaṛ n wexxam akin. Deg umakan-is, treqq tcemmaɛt, tefka-d tafat ad nwali.Aman n leḥlu ɛemmren abuqal, uɣent teftilin n trusi taneggarut. Ḥzen ay iṭij ur ceṛreq, tikli ur telli s leḥmeq, ur telli s uleɣwi… a wa ara tt-yafen d tameɣrust, di lḥara ad terr tili, s ddaw-as ad yettɣimi…
Zira