Ɣer tama n wussan n tmedyazt Yusef U Qasi d Si Muḥend U Mḥend I d- yellan di Timizart Nat Jennad ddurt-agi yezrin, tella-d timlilit akked Chrstine Alvarez yellan d tamedyazt, terza-d si Spanya, nessuter deg-s kra n wawalen , tmud-iten-id d zyada n tumert.
In-id i yimeɣriyen-nneɣ anta i d Christine Alvarez ?
Nekk isem-iw Christine Alvarez Rodrigez, luleɣ di tama n ugafa n tmurt n Spanya. Tamnaḍt-agi tefka anzi s waṭṭas i tmurt n Leqbayel acku d idurar ɛlayen yewten s lqed ɣer yigenwan, u d tama yettwasnen s tegrawliwin. Din i yura Albert Camus adlis amezwaru “ révoltes aux asturies” yeqnen ɣer tegrawla n 1930. Nekk d tamedyazt seg wasmi I d- cfiɣ akka. Isefra ttazzallen deg yixf-iw am wakken I ttazzallen yidammen deg yiẓuran-iw. Tamedyazt d aḥric meqqren di tudert-inu , d nettat i d abeḥri s wacu i ddreɣ. Tamedyazt-iw d tamedyazt n tudert.
Acu-t unamek I d as- tefkiḍ i wawal-agi aneggaru?
D tamedyazt I yettarran tudert rqiqet, ḥlawet, fessuset i tteɛbegga. D tin yettaran diɣ ddunit tecbeḥ, teččur d tahuski. Aya yakk icud tidmi n umdan ɣer wayen yefren, ɣer yinumak n tilin . Di tabḥat-agi I yekmen sser n tudert. Nekk yessnen u yeddren acu iwumi qqarren lɣerba n yiman ɣef yiman-is, greɣ-d iḥulfan n yinig ur nettfakka deg uifyar I zzuzreɣ … ahat d wa i d sser n tilin-inu da di tmurt n Leqbayel.. d anadi n yiẓuran…?
Acu tenwiḍ deffir n wawal-im: tudert ilaq ad terzu tidmi ɣer tuffirin n ddunit?
Annect-a icud ɣer tilin n yal yiwen…d yiwen n unamek n tmeddurt, n ugama, d kra n wayen yessqliliḥen ixef n umdan. Limer d lebɣi yal yiwen ad yidir tudert s lɣerḍ n lɣerḍ-is, beṛṛa i leqyud, beṛṛa I tkerkas, beṛṛa i yiberdan n timhujrit. Ilaq ṛṛuḥ, ixef akked wul ad mǧazin akken wa ur iɣeṭṭel wayeḍ.
lmeqsud d akken ilaq amdan ad yili yeɛdel d yiman-is?
Iman n yal yiwen yesɛa lemǧaz meqren. Iman icud ixef ɣer timadit-ines( nekk) di yal tikkelt deg ( Nek) n umadan yenquqel, timadit tettceqqiq, tettuɣal d tadla n yiɣisan.
Acu i am-d- tettawi tmedyazt deg tudert –im??,
Xedmeɣ isefra akken ad idireɣ di teɣzi n yixef-iw. Akken ad fleɣ nnig tacmet n wayen I d- yettnulfun. Tamedyazt d ẓẓerb i ṛṛuḥ akken ad yekk nnig n tlufa. Awal d abrid n tmenna akken kra teffer lbaḍna ad yeflali am yiṭij deg yigenwen …
Amek i am-d- tettban tmedyazt n teqbaylit??,
Selleɣ i uḥiḥa yellan deg yifyar … ttḥulfuɣ d akken isfra jebbden si telqay n zman.. fkan iẓuran di lemwaji n lawan, cebken deg umezruy. Awalen n teqbaylit ɛebban yid-sen takriḍt yessenhuzuyen iɣulad n tkerkas.
Ma nniɣ-am:
Illu?
D tigawt war tilist.
Tameṭṭut?
D tudert.
Tilelli?
D asrifeg
Taqbaylit?
D abrid yettawin ɣer uɣbalu n tidet
Ait Slimane Hamid