Massa Amroun Faḍma tameṭṭut n Gaoui, i yettwasnen s yisem «Faḍma Σwica », n taddart n Wizgan, tewweḍ leεfu n Rebbi iḍ n lexmis γer lǧemεa n ddurt-agi yezrin, di lεemr-is 108 n yiseggasen. Nna Faḍma Σwica tefka-d acḥal d axalaf i 3 n tsutiwin, gar warraw-is, yessi-s, arraw n warraw-is d yessi-s d wiyaḍ, tessefrurex ayen yugaren 60 n yimdanen, tedder yiwet n tudert yelhan aṭas gar twacult-is.
Tlul deg useggas n 1903 i taddart n Wizgan, tedder snat n tegrawliwin n umaḍal (1914-1918) d (1939-1945) akked tegrawla Tazzayrit (1954-1962) anda i d-tefka ayen yellan deg-s, ama s tezmert-is neɣ s cci-s. Nna Faḍma Σwica tettwamḍel ass n lǧemεa yezrin, 22 yulyu, di tmeqbert n taddart n Wizgan anda I ḥeḍren acḥal n yimdanen.
Nna Faḍma d tamγart wassaren di temnaḍt n Wizgan, γas temmut yella wayen i d-teğğa s deffir-s, acku llan wid i yeskelsen isura fell-as, teḥka-d tudert-is merra, llan daγen wid i d-icerwen aṭas n yisefra-ines, sdukklen-ten, rran-ten d adlis ara d-yefγen deg useggas i d-iteddun.
Nna Faḍma Σwica d taεwint anda I d-ugmen waṭas n yimdanen d tsutiwin ifuden idles d tmusni.
Islam Bessaci