85 n yimdanen i yemmuten s lbumbat n yiγallen n NATO mi llan ttbumbaṛdin deg yiwen n umkan umi qqaṛen Wad Majer i d-yezgan di temnaḍt n Zliten . Tawaγit-a yeḍṛan deg ass n ttlata iεeddan, tella-d mi tuγ timesrifgin n yiserdasen n Tdukli n Ugafa n Waṭluntik(NATO) kkatent imukan n trebbaε timselḥin n Lqeddafi akken ad sisehlen tikli i yigrewliwen i yellan γef tewwura n temnaḍt-a tasetratijit ladγa imi teqṛeb γer Tṛablus tamanaγt n tmurt, acu kan abumbaṛdi-ya yegla s uzegzaw d uquṛan imi tilibizu n leḥkem alibi tesken-d ttsaweṛ n txazabit yeḍṛan deg umkan iγer wtent tmesrifgin ideg tuget n wid yemmuten d leṭwafen akked yigerdan d tlawin, aya rnu γur-s imejraḥ d tmezduγin idermen iss d-tegla tyita-ya n NATO. Γas aya, imḍebbren yellan γef uqeṛṛu n Tdukli n Ugafa n Waṭluntik nekṛen ayen akka xedment tmesrifgin-nsen, wekden-d dakken tiyitwin-nsen ḥuzant ala imukan n trebbaε timselḥin n Lqeddafi. Taxazabit-a tezga-d tsuεed mliḥ leḥkem n Lqeddafi i iεeṛḍen ad d-yawi yes-s asaned n yimdanen ama di Libya neγ anda-nniḍen, acu kan drus maḍi n wid i d-yewten deg wayen akka yexdem NATO i yeffγen tikelt-a i ubrid iss t-ikellef usqamu n laman n Ugraw n Leǧnas Yedduklen(ONU) yellan d aḥareb γef tudert n yimezdaγ n Libya. Ula d Ban Ki-mon, aselway n l’ONU deg ulγu i d-yeγra zdat n ttawilat n yisallen n umaḍal segmi teḍṛa taluft-a, ur itehhem ara srid NATO, maca yessuter seg akk timiwa yettnaγen di Libya akken ad ḥadrent γef teṛwiḥin n yimezdaγ. Yuγ lḥal qbel ad yemmeslay Ban Ki-mon, llan wid i yessutren deg-s ad iger iman-is, am akken i yexdem D.J.Kocinich nnayeb amagday di lkungres n tmurt n Marikan i yuran tabrat i Ugraw n Leǧnas Yedduklen ideg yessuter ad gren iman-nsen akken ad yeḥbes NATO tucḍiwin-a i ixeddem di Libya, imi ffγent i ubrid n lameṛ uṭtun 1973 , iss t-ikellef usqamu n laman yellan d aḥareb γef yimezdaγ. Akken ad nesmekti lameṛ-a yeffeγ-d yes-s usqamu n laman n Ugraw n Leǧnas Yedduklen, mbeεd tidyanin yeḍṛan di Benghazi deg ayyur n fuṛaṛ yezrin anda iγallen n laman n leḥkem n Lqeddafi nγan d luluf n yimesbaniyen i d-yeffγen γer yiberdan akken ad sutren tilelli-nsen d yizefan-nsen.
Seg tama-nniḍen igrewliwen simal ttaẓen γer tmanaγt, εlaḥsab n yisallen ineggura iss d-xebbṛen, tirebbaε tigrewliwin n usammar ṭṭfent tamnaḍt n Briga i yetwasnen s lmeṛsa-ines yesεan azal ameqṛan di tdamsa n tmurt, ma d tirebbaε tigrewliwin n umalu, atent-id γef tewwura n temdint n Zawiya i iqeṛben s waṭas γer Tṛablus. Γas akk aya, aṭas i yettwalin cceda ad tḍul di Libya s sseba n yimenγan qessiḥen i d-yettilin yal ass, rnu γur-s amihi n tyitwin n yiγallen n NATO i igellun yal tikelt s leṛwaḥ n yimezda&gamma,; s wakka llan wid i d-yeγṛan γer unadi n tifrat s ubrid n talwit ladγa wa d ṛṛay i yeddem segmi i tebda cceda Ugraw n Tmura Tifriqiyin, i yennejmaεen yakan d snat n tmiwa tixṣimin mebla ma ssawḍen γer tifrat imi Asqamu Aγelnaw Uεḍil (CNT) i yettmetilen igrewliwen icudd tifrat γer utixxeṛ n Lqeddafi seg leḥkem, Lqeddafi seg tama-s yugi ad yeqbel cceṛṭ-a γas ma s tidet d netta akk i d sseba n wayen akk yeḍṛan di Libya. Wissen ahat deg ussan i d-iteddun ad yili umaynut ladγa deg ayen yeεnan tifrat n ṭṛad-a iweεṛen d useḥbes n tazla n yidammen ; wa d assirem n yal amdan ama di Libya neγ anda-nniḍen.
M.C