Yerna-d umaynut i ccna n teqbaylit s tuffɣa n uḍebsi n ucennay Chafaa Moualfi. Aḍebṣi iwumi yefka azwel “A lezzayer ɛzizen”, d agzul ɣef waddad n yineḍruyen i izerrin ussan-a ɣef tmurt n Lezzayer. Yefren ad ilin yizwal-nniḍen i tesfift-is ɣef tayri di tuget iwumi yefka aḥric d wazal d ameqqran, am tezlatin “Ttu-yi. Bɣiɣ ad am-hedreɣ”.
Akken daɣen i yecna deg tezlatin tis ukkuẓet d ṣat ɣef lfuruḥ n tmeɣra imi d lawan-is tura. D tizlatin i izewwel akka “Lḥenni, tameɣra n wuzyin”. Aḍebsi-a, ad naf deg-s 7 n tezlatin, yeffeɣ-d ɣer teẓrigin New Harmonie Production. Chafaa Moualfi, d ilemẓi yesɛan 38 n yiseggasen, seg taddart n Tewrirt U Ɛisa, adewwar n Ikeǧǧan yettabaɛen ɣer wasun n Sidi Ɛic.
D yiwen icennun di tmeɣriwin n taddart segmi yella meẓẓi, yettawi lfen deg wul-is. D tidersi n ttawilat i t-yeǧǧan armi d ass n 15 yulyu ara d-yessuffeɣ aḍebsi-s amezwaru. Nessaram mačči d win ara yilin d aneggaru. Yenna-aɣ-d mi t-nesteqsa “Aṭas n usirem i sɛiɣ s tuffɣa n uḍebsi-a, ad ɛerḍeɣ amek ara xedmeɣ ugar sya d asawen”.
Kh. A.