Tettuneḥsab tesdawit d ammas i usnulfu n tẓuri, d ammas n usekfel n tzemmar, d amrar ɣezzifen i icudden gar usdawan d tɣuri d wayen i iḥemmel. Tasdawit, d annar anesbaɣur iwesɛen i d-yessemliliyen isdawanen s yiswiren yemgaraden. S zzyada ɣef taɣulin n leqraya i ḍefren, yal anelmad neɣ tanelmadt yesɛa tazmert-nniḍen uɣur yemmal, d addal, d ssinima, d aẓawan neɣ d ccna, d asuneɣ akked tira. Ɣef waya, tella-d tikti n usnulfu neɣ n uheggi n yiwet n Tfaska taɣelnawt i tigin n usaru asdawan.
D tafaska ara d-tessuddes tesdawit n Wehran deg tama n USTO Muḥemmed Buḍyaf, gar wussan n 14 ar 16 yennayer 2020 i d-iteddun, seg 9h n ṣṣbeḥ ar 18h n tmeddit. Aṭas n yiswan i tesɛa tfaska-a n ssinima tasdawant, gar-asen asegrew n waṭas n yilmeẓyen isdawanen seg merra tiwilayin n tmurt seg wid yemmalen neɣ iḥemmlen taɣult-agi n ssinima d usali n yisura. Acku d ilmeẓyen-a i d imal n ssinima, rnu uklalen asebɣes d tukci n tegnit akken ad d-sbeggnen tizemmar-nsen. Rnu ɣef waya, tettuneḥsab tfaska-a zun d tameɣra.
D temlilit meqqren gar yitran d tgejda n ssinima tazzayrit ara iḥeḍren akked yilmeẓyen. Akken ara tili, diɣ, d assaɣ ara icudden gar tsutwin (ad d-refden yilmeẓyen-a tifukas d tulmisin deg unnar-a). Ma d tiwtilin n uttekki i wid yebɣan ad jerden iman-nsen di tfaska, tberreḥ-d Tenmehla n tfaska s 11 n tewtilin, ad d-nebder gar-asent : Akk inelmaden izzayriyen ɣur-sen azref ad kkin; ad yili usaru d amecṭuḥ (ur yettɛeddi ara 40 mn); ad yili d asaru yettwaxedmen deg yisegggasen 2018 / 2019; ad kkin yisura s tlata n tutlayin taɛrabt, tamaziɣt d tefransist, maca sin-a ineggura, ilaq ad sɛun tasuqqilt ɣer taɛrabt; yal asaru ad yettwagenses s sin n yisdawanen deg wass n temlilit; azemz aneggaru n uceyyeɛ n yisura d ass n 20 duǧamber 2019. Tamawt, i yigensasen n yisura ara iḥeḍren deg tfaska ussan n 14, 15 d 16 yennayer 2020 ad asen-theggi tenmehla iḍes d tuččit d usiweḍ war lexlaṣ.
Khaled Achoui