D lwilya n Tizi Uzzu, i d-yewwin amḍiq amezwaru di tfaska tamiḍant n uẓawan atrar, i d-yellan deg lwilaya n Tipaza ussan n lǧemɛa 12 d ssebt 13 yulyu 2019. D agraw n uẓawan atrar n Uxxam n yilmeẓyen n Buzgan, i igensen lwilaya n Tizi Uzzu deg tfaska-agi, i yessawḍen ad ɛeddin temsizzelt taɣelnawt i d-yellan ass n 24 yulyu 2019 deg lwilaya n Wehran.
Di tezrigt-agi tis 18 n tfaska-agi taɣelnawt n cca atrar, ad yemḥezwar ugaraw-agi n uẓawan n Buzgan akked 15 n terbuyaɛ n lwilayat-nniḍen n tmurt n Lezzayer. Gar lwilayat, ara yettekkin deg tezrigt-agi ɣer tama n Tizi Uzzu, nezmer ad nebder; Ɣillizan, Tyaret, Beccar, Galma, Bgayet, Illizi, Tamenraset… Ad d-nesmekti kan belli, d tarbaɛt n Uxxam n yilmeẓyen Cellaḥ Muḥend n Buzgan, i d-yufraren s warraz amezwaru, deg tezrigt tis 13 n temsizzelt n ccna atrar, i d-yellan deg Umecras di Buɣni gar 24 ar 26 yunyu 2019 di lwilaya n Tizi Uzzu.
Tazrigt tis 8 n Tfaska n yimuhal n ufus deg Yilula Umalu (Buzgan)
Ass-nni n ttlata 16 d wass-nni larebɛa 17 yulyu 2019, tella-d tezrigt tis ṭamet (8) n Tfaska n yimuhal n ufus, i d-yettilin yal aseggas deg Uxxam n Yilmeẓyen n Yilula Umalu di dayra n Buzgan. Ddeqs n yigerdan n tamiwin yemgaraden n lwilaya n Tizi Uzzu, i yettekkan deg tfaska-agi ɣer tama n waṭas n tddukkliwin tidelsanin d yixxamen n yilmeẓyen n lwilaya-a. Ɣef teɣzi n sin wussan n tfaska-a, lemden yigerdan amek ara d-snulfun aṭas n tɣawsiwin icebbḥen, aṭas i nezmer ad nessemres di tudert n yal ass.
Tafaska-agi s timmad-is, d abaɣur i yigerdan, imi i d asen-tettakk tegnit ad uraren, ad lemden, ad mḥezwaren, yerna ad d-snulfun ayen bɣan. Mbeɛd mi sulin sin wussan n uxeddim, tettunefk tegnit i leqdic adelsan, yecban amezgun d ccna, am wakken diɣ tessuli tezrigt-agi s ufraq n warrazen ɣef wid i d-yufraren deg temsizzliyin yellan. Deg uḥric n temsikniyin, yuɣal warraz amezwaru i Tzeqqa tagetwurant (polyvalente) n Tamda, ma d wis sin yewwi-t Uxxam nyilmeẓyen n At Buwadu, wis tlata, yettunefk i Alha n Buzgan. Deg uḥric n umahil ifazzen, d Tidukla n Yimzal d usnulfu n Lǧemɛa n Sariǧ i yewwin arraz amezwaru, ma d wis sin yuɣal i Uxxam n yilmeẓyen n Yilula Umalu, aneggaru iṣuḥ-d Tazeqqa tagetwurant (polyvalente) n Tamda.
Tessuli di Tubiret tezrigt 1ut n tfaska n tẓuriwin timensayin
Ass-nni n lexmis, 18 yulyu 2019, i tessuli tezrigt tamenzut n tfaska n tẓuriwin timensayin n Tubiret, i d-yellan gar 12 ar 18 yulyu 2019 deg Uxxam n yidles Ali Zaamoum. Di tfaska-agi, yettunefk deg-s wazal i yidelsan iɣerfanen d tgemmi taɣerfant. Ɣef teɣzi n ddurt, ugar n 20 n lwilayat i d-iseknen timsikniyen-nsent, gar-asent; Qsenṭina, Leɣwaṭ, Xencela, Tlemsan, Tizi Uzzu, Bgayet… Ddeqs n temsikniyin yemgaraden i iɛemren tazeqqa n temsikniyin n Uxxam n yidles n Tubiert. Gar uẓeṭṭa d tewsatin-is yemxalafen, uraren, tuččit, iselsa, afexxar…
Am wakken diɣ i d-yella wahil adelsan d anesbaɣur, gar ccna, amezgun, isaragen, asenɛet n yisura, asenzi s ubuddu n yidlisen, icewwiqen d tmedyazt d waṭas n leqdicat-nniḍen. Ma ɣef yiswi n tfaska-a, tenna-d Massa Cherbi, Tanemhalt n Uxxam n yidles Ali Zaamoum: “Iswi agejdan n tfaska-agi di tezrigt-is tamenzut, d asenɛet n ugerruj adelsan i nekseb, d tukci n tegnit i yinḍiyen i wakken ad d-siknen leqdic-nsen ɣer tama n uḥraz d useḥbiber ɣef tgemmi d tẓuriwin-nneɣ tiqburin”. Ad d-nesmekti kan belli tafaska-agi tettwassuddes-d sɣur Uxxam n yidles n Tubiret s talellet n Tddukkla “Burǧ Ḥamza” n lwilaya n Tubiert.
Timsizzelt n ugmam (Lḥuma) neɣ taddart tazedgant n Bgayet
I lmend n usebɣes n tezdeg d useḥbiber ɣef twennaḍt, yeslul-d Useqqamu aɣerfan aɣiwan n Bgayet, timsizzelt n taddart neɣ agmam azedgan di tɣiwant n Bgayet. D timsizzelt deg tezrigt-is tamezwarut ara yettwassuddes sɣur tɣiwant n Bgayet s tallelt n Teseqqamut tadelsant n tɣiwant-agi n Bgayet. Ma d ilugan d warrazen n temsizzelt-agi n tezdeg, ad d-banen ugar yisallen fell-asen sya d tasawent. Deg wussan i d-iteddun, ad yebdu ujerred n lḥumat d tuddar ara yemḥezwaren ɣef warraz-agi ara yessbeɣesen tezdeg deg tɣiwant n Bgayet.
G. A.