Sḥasfen s waṭas yifellaḥen i – yelhan s ttrebga n tzizwa ɣef lexsas meqqren deg lɣella n teɣrasin n tzizwa.
Dɣa ɣef leḥsab n M. A., d afellaḥ i d-yelhan s ttrebga n tzizwa deg tɣiwant n Mεatqa, yenna-d d akken: «Deg teɣrasin, ulac yakk tament, am iseggasen iεeddan. Ciṭ n tament yellan akka deg teɣrast-agi, ur tkeffu ara ula d lmakla i uglaf n teɣrast».
Cuden yifellaḥenlexsas-agi n lɣella ɣer ugama imi ur d-yili ara unezwi iwatan deg tefsut iεeddan akken ad jemεent tzizwa ayen yakk ḥwaǧent n tlakmast (nectar) i wakken ad xeddment lɣella. Seld tirza n kra n yifellaḥen i d-yelhan s ttrebga n tzizwa deg lwilaya n Tizi-Uzzu, yenna-aɣ-d yiwen ufellaḥ i d-nemlal deg Tenmehla n srabes n tfellaḥt n Tizi-Uzzu : «Aseggas-agi, tizizwa d timecḥaḥin, ur aɣ-d-fkint ara ayen nurǧa. Yewwid fell-aɣ ad nerǧu aseggas-nniḍen ahat ad d-tili lɣella». Dɣa ula d afellaḥ-agi, icudd ssebba n lexsas-agi ɣer unezwi yellan ladɣa deg tefsut iεeddan, anda tella tefsut wezzilet nezzeh, dayen i d-yezgan d aεewwiq ɣef ujmaε n tesmektiwin i iwulmen i lxedma n tament. Kra n yifellaḥen ay nemnal deg tirza-naɣ, sεan daɣen rray-nniden.
Dɣa nutni ur cudden ara kan lexsas-agi ɣer tmental n ugama, maca llant ssebbat-nniḍen i d-yellan d aεewwiq ɣef usuffeɣ n lɣella yelhan n tament. Ɣas ma ifellaḥen sfaydin-d s usileɣ deg uḥric n ttrebga n tzizwa, d usileɣ deg unamek n usuffeɣ n leṣnaf ifazen n tament, maca ulac ttawilat iwatan i waya. Assegas-agi, iḥuza lexsas ula d tiɣrasin n tzizwa yettidiren deg tzeẓwa ( ruches sauvages), ɣef leḥsabn n yiwen n ufellaḥ yesεan tirmit meqqren deg uḥric-agi n tukksa n tament n tzizwa yittidiren kan deg tzeẓwa.
Ali Zalouk