Acḥal ay-agi tura, tamnaḍt-agi n yimẓabiyen tettucewwel. Xas ulamma mxalafent sebbat n tedyanin, meεna tifrat tban yiwet ; xas akken yiwen meεdur, wayeḍ d lḥeqq-is, acu kan cwal ilaq ad yeḥbes. I wacuγer, ihi, ur yeḥbis, ur iḥebbes, ur qrib ur εliḥal ? Sebba n waya, ad tt-naf, ahat, deg umezruy n tama-agi. Imezdaγ n Γerdaya bḍan γef sin : llan wid i tt-yeṭṭfen si zik, wid-nni i d-yusan deg lqern wis 10 γer din. Wigi, d imẓabiyen, heddren ‘’Tamẓabit’’. Llan wid-nniḍen iwumi qqaren ‘’Aεraben’’ imi ttutlayen taεrabt, ussan-d umebεed zedγen dinna. Wigi, llan ur ttγimin ara deg yiwen umekkan deg sṣeḥra, acu kan tikelt-a qqimen dinna imi ufan ayen bγan. D acu kan, xas akal yesdukel imezdaγ-a, aṭas n temsal i ten-iferqen. Tamezwarut, d tamsalt n ddin imi yal yiwen s lmedheb-is, yal yiwen s lğameε-is d tmeqqbert-is. Tis snat, d tameslayt, yal wa s tutlayt-is. Tis tlata, d amgarad gar tudert-nsen : Imẓabiyen, ttidiren d idrumen weḥd-sen. Yal adrum yesεa leqwanen amek iteddu, u yerna ur qebblen ara ad d-yekcem ‘’uberrani’’ gar-asen (win ur nelli d Amẓabi). Ma si tama-nniḍen, wid iwumi qqaren ’’Aεraben’’, mačči kan ugin ad setεerfen s tudert am ta, meεna ḥesben imẓabiyen ffγen i ubrid n Rebbi imi sεan lmedheb Ibaḍi. Llan wid i asen-yeqqaren, dγa, ‘’tuklalem lmut γef wanect-a’’.
Ihi, sebba kan d tamecṭuḥt, ad tekker gar-asen, xas ulamma d arrac n lakul i yennuγen. Yal tama tesseḍlam tayeḍ, u yal ta tjebbed-d tiqdimin, ayen irennun zzit i usγar. Ar ass-a n wussan, tugi ad tefru, anwa ay d abrid a abrid ? akken i as-yenna winna n zman.
Hocine.M