Asfuggel n yennayer yuɣ akk Tamazɣa, yal tiɣmert s wahil-is, yal yiwen s ubrid-is. Dɣa, i lmend n wansay-a adelsan, yella-d ddurt-a yezrin di Tanja, tamurt n Merruk, yiwen n ttiɛad s wazal-is n twizi d umɛiwen gar tddukkliwin uɣur ttwaɛerḍen kra n Yiqbayliyen i usenɛet n yisaragen. Seg wid yekkin deg usihar-a n Merruk, ad naf Mass Muḥend Tilmatin, i yellan d amesdawan. Mass Ɛecwi Ɛezdin, d aselmad n tmaziɣt. Mass Ɛezdin Ɛebdus, d amaray amatu n Useqqamu aɣiwan n yilemẓiyen n Ukeffadu, d aneɣmas. Mass Ɣilas Ɛebdus, d aselway n Useqqamu-a aɣiwan n yilemẓiyen n Ukeffadu akked Mass Muḥend Belqacem, d ajenyur deg yinagrawen isenselkamen. Ad d-nesmekti d akken thegga-d timlilit-a tddukkla n Yibaskiyen n Spanya akked tddukkla n Masinisa n Tanja n Merruk, ara yilin seg 09 armi d 16 yennayer, iswi-ines d ambaddel adelsan gar yigduden n Tmazɣa abeɛda. Ula d yiwet n tmeɣra yetturaǧu ad tili deg wadeg i lmend n usfuggel n yixef n useggas-a amaziɣ 2969. Mi d-yewweḍ wass ideg yesɛa nnuba, iga-d Mass Ɛecwi Ɛezdin asarag s uzwel i icudden ɣer uɛeddi ɣer tira d uselmed n teqbaylit. Ma d Ɛezdin Ɛebdus akked gma-s Ɣilas, i d-yeddan deg wahil i wass n 10 yennayer, fernen ad seftin awal deg usarag-nsen ɣef usentel-a: Asemres asniles n tutlayt taqbaylit deg Useqqamu aɣerfan n Ukeffadu. «Ad snemmreɣ amdakkel-iw Muḥend Tilmatin imi d netta i yellan sdeffir n leqdic-a di Merruk. Tanemmirt daɣen i yimdukkal i yekkin yid-neɣ deg temlilit-a », i aɣ-d-yenna Ɛezdin Ɛebdus, yiwen seg wid yekkin deg uneḍruy-a. Send ad d-yernu deg wawal-is: « Ssarameɣ afud igerrzen i tddukkla n Yibaskiyen akked tin n Masinisa deg leqdic-nsen ɣer sdat. Armud-a d win ara d-yernun lǧehd i tutlayt d tgemmi-nneɣ, imi idles-nneɣ d agerruj ».
M. K.