Macahu tellemcahu ad tt-yeḍbeε Ṛebbi d asaru. Yiwen urgaz yeqqar-as i mmi-s: « Ammi i wacu teṛṛiḍ akk medden d imeddukkal deg ur d-itekk nfaε? Ugadeɣ limmer ad ten-tiḥwiǧeḍ di tegnit n ddiq, yiwen ur ak-d-yeqqaṛ anεam. Mmi-s ur yesmeḥsis ara i wawal acku iɣil tizegzewt d leḥcic meṛṛa. Yeqqaṛ-as i baba-s: « Sεiɣ leḥbab yal amḍiq, mačči am kečč, ur tufiḍ ara win ara ak-iḥemmlen seg wakken teswaεreḍ timsal aṭas. Baba-s: « A mmi, nekk sεiɣ yiwen n uḥbib beṛka, deg-s lbaraka, jeṛṛbeɣ-t, ufiɣ-t d argaz. Yugi mmi-s ad yili d uḥdiq. Argaz terra-t tmara ad ixdem kra i wakken tabṛat-is ad d-taweḍ s allaɣ n win ara d-yeǧǧ d asalas n uxxam. Tusa-t-id tikti amzun-itt. Iddem ikerri, yezla-t, iɣumm-it s ubeḥnuq mellulen, yessames-it d idammen. Yuzzel ɣer mmi-s, yessawel-as: « Kker kker a mmi, teḍra-yi-d dagi taluft ». Ikker-d mmi-s s tɣawla: « Acu a baba d acu ? » Nɣiɣ yiwen s ujenwi.
Tenɣiḍ -t? Anida-t ?
Ṛwaḥ ad t-twaliḍ.
Mi t-iwala mmi-s yexlaε, yenna-as: « A baba amek ara as-nexdem? ». Baba-s: « Ruḥ a mmi muqel-d albaεḍ seg leḥbab-ik i wakken ad aɣ-iεiwen ad t-nawi sanda ara t-nɣebbi ». Iruḥ uqcic ttnaṣfa n yiḍ, yezzi-d akk ɣef leḥbab-is, win iwumi yeḥka tadyant ad as-d-yerr: « Ala, ur zmireɣ ara i tigi ». Yuɣal-d uqcic s axxam. Baba-s: « Acimi akka ur d-tewwiḍ ara imεawnen? ». Mmi-s: « Ugin, uggaden ».
Amek ara nexdem ihi?
Ruḥ a baba ɣer Dda leflani, yak d aḥbib-ik.
-Ad ruḥeɣ ala netta i sεiɣ.
… Yettkemmil
Yahia Yanes