Ffɣen-d yiselmaden n uswir amenzu deg waṭas n twilayin, imalas yezrin, akken ad ssutren aseɛdel-nsen d yiswiren n uɣerbaz alemmas d tesnawit deg waṭas n lecɣal yerzan amahil-nsen, imi ttwalin belli iselmaden yettmahilen deg uswir-a adday, yettili-d fell-asen lḥerṣ ugar n yiswiren-nniḍen. Gar tmental i ten-yeǧǧan ad bedden sdat n teɣlift n usegmi akked tenmehliwin n usedwel d waṭas n yiɣerbazen deg wakal n tmurt, nnan belli ttwaɛezlen, tidersi n tcehrit-nsen, sswayeɛ i qeddcen seg ṣṣbeḥ alamma d tameddit (ttawḍen ɣer 30 n sswayeɛ deg yimalas), rnu ɣer waya taɛessast n yinelmaden deg ubaraz d usečču d yidgan-nniḍen n uɣerbaz.
D ayen i ten-yeǧǧan ad farṣen tagnit n wass aɣelnaw n uselmad i d-yettezzin yal ass n 5 tuber n yal aseggas, ad gen abeddi-nsen azekka-nni akken ad d-sbegnen lɣiḍ-nsen. Ad ssiwḍen, diɣ, isuturen-nsen ɣer yimasayen yeṭṭfen taɣult n leqraya, ad d-muqlen ɣur-sen, ad snefsusin fell-asen taɛkemt d wuguren. Gar wuguren daɣen i ten-yerḥan d aheggi n tfertin n tɣuri deg uxxam s tira n ufus i wugar n 10 n yilmuden : gar-asen wid ur nelli d taɣult-nsen am usuneɣ, tusnakt, aẓawan d waddal akked ṭaẓẓayt n temsirin ɣef uswir n unelmad. Ma d asuter agejdan i refden, uɣur i d-ssawlen deg yiẓedwa inmettiyen i yakk iselmaden n uswir-a adday, d akken d lawan ad ddukklen deg tṣeddart n uxeddim akked uswir n uɣerbaz alemmas, acku, ɛlaḥsab-nsen, leɛtab i ttenɛettaben yugar tacehrit i ttaɣen.
«Ibeddi-a n yiseɣ, ur ttekkant ara deg-s tenmaliwin (les syndicats), akken ur d-yettili ara ubeddel n tigawt. Ma nuɣal-d ɣer wuguren, neṭṭalab aseɛdel d yiswiren inaflayen, tukksa n tɛessast d usenqes n sswayeɛ n uxeddim, aɛiwed i wahil n tsuta tis snat d tuɣalin ɣer talɣa n uselmed sḍis n yiseggasen deg uɣerbaz amenzu, d ayen ara yekksen taččart n tneɣriyin», i d-yenna yiwen n uselmad. Iselmaden igensasen, gan ineqqisen ara yettunefken i yinemhalen n usedwel n twilayin merra, seg tama-nsen wigi, ad t-ssiwḍen i uneɣlaf n usedwal. Deg uraǧu n tririt yelhan, myefken asiher i yibeddiyen d tuffɣiwin-nniḍen.
Kh. A.