Immarni d deg iyar n tsekla tamaziɣt di Arrif ij n wedlis d amaynu, netta d ammud wis krad n Karim KANNOUF: “sadu tira… tira”, awarn i “Jar wesfed d usennan” (2004) d “Reâwin n tayri” 2009. adlis a myawazen deg usegged n tira d tiɣri tuɣzint H.Banhakeia El Hossaein Farhad d A.ZIZAOUI. netta d adlis wis kuz’ id- tessufeɣ tabridt n tɣuri timazighin n tesdawt n Wejda.
Mamec id yusa di temsizwart n wedlis a:
Adlis a isseɣmi -d, jar tefray- nnes, ca n tqessisin d timaynutin, mani ameɣri ad daysent yaf isental msebd’an maca ttemsagarn di talɣa. Azrawi igga asurif deg I yar n tqessist tamaziɣt: yarcem izlan- nnes s wattas n tmeɣra i iggin afray icna. Kannuf ittsessu tamaziɣt s tidi n tira huma ad teɣmi ad terqeh deg I yar n tsekla tamadlant.
Tikti i ittcuqn ammud a d taɣuyyit mgal ahewws n tesɣart n Umazigh, zi Siwa ar Kanari. Nettat temsebda ɣaf sin n wudmawn: Tira d tayri. Tira di tqessisin d asentel d amaynu di min ittwarun ar ass-a. Nettaf day-s axarres i isseddaran min I teddarn di tatlayt am tmaziɣt. Izlan a d awardi i wulawn yarɣin s ucemmud n tira…
Di “Sadu tira… tira“, issars d marra min izemmar ad yini d marra min war izemmar ad yini. Izlan a ssummten leh’riq d tghufawin, tad’sa d imettawn, aɛeffar d timmuzɣa. Fruryn d alaɣi i war ittmettin. Tira a ttinitent xaf tutlayt tamaziɣt, xaf tallest yarezzun tifawt, xaf wfgan i iffudn tayri, xaf umezwag i iffudn Arrif, xaf umetta i iffudn taḍsa, xaf ufadi i iffudn aman, xaf weɣray i iffudn anqar, xaf tussanin i iffudent leɛwin, xaf useɣdi i iffudn awal, xaf wawal i iffudn tira, xaf tira i iffudn tira.
Kannuf ixs ad yari, tira- nnes xsent ad ksent afray xaf tmaziɣt, ad yari min ɣars di twangimt- nnes, huma ad nessen belli netta iqqen ɣar tmaziɣt, tamaziɣt teqqen ɣars. S manaya izzi aneɣ d tiqessisin a yardent qaɛ iwaln n tcuni imudn s leḥriq d tayri, s marra tufrayin n umaru.
Deg umeggar, tiqessisin a tettarent zeg Imaziɣen ad tent- ɣarn, ad tent- zzun deg wulawn -nsen, war tent- ttejjin ca d tiyujilin teddarent di tattut…
A. ZIZAOUI