Tettkemmil tecrift taseklant i d-tettheggi seg tikkelt ɣer tayeḍ tddukkla Asaki n tɣiwant n Ticci, i d-yezgan s wazal n 16 n yikilumitren ɣer Usamar n waɣir n Bgayet. Dɣa, ass n sed, 16 deg wayyur-a ideg nella, d amaru-aneɣmas aqbayli Mass Allas Di Tlelli i yellan d inebgi n temnaḍt-a mm yiftisen, akken ad d-yawi awal ɣef udlis-is aneggaru i d-yesuffeɣ d tajmilt i tmeɣnast n tlelli Katya Bengana, s uzwel n « Katia Bengana : La lycéenne qui a nargué l’islamisme».
Deg wayen i d-yenna deg usarag, i idumen azal n 4 n yisragen, yemmeslay-d abeɛda umsarag ɣef umennuɣ n Katya mgal lḥiǧab d tesnakta taɛrabt-tineslemt. Yewwi-d daɣ awal Mass Allas ɣef yizen n Katya ɣef wayen yerzan lḥiǧab i d-ibanen d ansay aqbur deg Usamar Alemmas, azal n 80 n leqrun send talalit n Ɛisa. Ansay-a, yufa-d iman-is di tεebranit, send ad t-yerfed Saint Tertullien di tmasiḥit, ɣas ur d-yeddi di Ṭṭura (Bible). Yemmeslay-d Allas dɣa amek yuɣal uceṭṭiḍ-a d ttawil i urkaḍ n tmeṭṭut d usfaḍ n yidelsan iwerdanen.
Deg usarag, yella-d daɣ umeslay ɣef tlawin i iqeblen lmut wala azaglu n usberbar-nni, d ɣef kra n tlufa n tsertit. Ma d isteqsiyen, qqnen ladɣa ɣer yiseggasen-nni n rrebrab, ɣer tmetti taqbaylit, ɣer tlelli n umdan d ɣer tmagit s umata.Ɣer taggara n temlilit, deg wadeg n usenzi s ubuddu am wakken yella di tannumi, yefren Allas Di Tlelli ad yeg tikci s ubuddu n udlis-a ɣef tlemẓit Katya Bengana. « Di tmuɣli-w, anecfu (la mémoire) n yimeɣrasen d wasaḍen i yeddren di yiwet n tallit yid-nneɣ, ur d-yewwi ara ad yenz s yidrimen.
D tamsalt n tezdeg d leqder i nutni d yimawlan-nnsen (…) », i aɣ-d-yenna Allas Di Tlelli. Ad d-nesmekti d akken ddeqs n yimura, imeɣnasen d yicennayen i yekkin deg udlis-a imezdi, seg-sen ad d-nebder Yusef Zirem, Malika Dumran, Zedek Mulud, Kamal Tarwiḥt d wiyaḍ. Aqeddic n ubuddu n udlis i tnubit-a i d-yesbeggnen addud-is mgal arkaḍ n yizerfan, yebda-t umeskar, ɣef wawal-is, ugar n 4 n yiseggasen ɣer deffir. Syinna, mi d-mden akk yiḍrisen n yimekkiyen, yeffeɣ-d kra n wakud aredqal ɣer teẓrigin La Pensée n Tizi Uzzu.
M. K.