Anebdu yejba-d, yegla-d s uẓɣal. tifesniwin simmal ttalint, almi staqfent imdanen. Ussan-agi ineggura, tturarent di 40 Celsius. Widak iwumi telsa teglimt, terwa tɛebbuṭ, ahat gan ttawil i yiman nsen, ruḥen ɣer lebḥer, ma d wiyaḍ, tezzin i tili, ssedragen iqerray nsen, ahat ad d-iferreǧ Rebbi fell-asen yiwen n wass.
Deg tɣiwant n Ɛǧiba, ilmeẓyen ur sɛin ara sanda ara rren, iwakken ad ttun meqqar azɣal d ɛeggu n useggas merra. Wid yesɛan kra n yimassen, zemren ad rzun tikkelt neɣ snat ɣer lebḥer, maca ur zmiren ara ad ɛeṭṭlen dinna. Liḥala ur tessefk ara i waya, imi amerreḥ yecban wa yessutur tadrimt s waṭas. Ma nerra kan ɣer wazal n usekru n yixxamen di Bgayet, ad naf wwḍen alamma 4000 n yidinaren i wass ! ɣer yiri n lebḥer anda llan igiṭunen, ssuma dinna ur txus ara: 2000 n yidinaren i wass. Amek ihi ara yizmir yilemẓi ad yesɛeddi ussan dinna ? D ayen yeǧǧan tuget n yilmeẓyen ttarran ɣer yidurar, imi dinna ur yetteḥwiǧi ara kra n tedrimt I umerreḥ.
Wiyaḍ, tettun lehmum nsen deg wurar n ddiminu. Imi, ulac akken kra n ttawilat nniḍen ara ten-ijemɛen. D acu kan, taqbuct n umaḍal n ddabex n uḍar tusa-d deg lawan yelhan, imi tessettu i yimdanen aṭas n tlufa.
M. Smail