I tikkelt tis snat, taddart n Zoubga i d-yezgan deg tγiwant n Yililten tewwi amḍiq amezwaru n taddart tazeddgant gar tudrin n tmurt n Leqbayel. Tikkelt tamezwarut tewwi-t deg useggas n 2007. mebεed 6 yiseggasen γef warraz-a, tewwi wayeḍ aseggas-a (2013). Timsizzelt-a, yettheggayi-tt-id useqqamu aγerfan n lwilaya n Tizi Uzzu (APW). Ihi, i lmend n waya, taddart n Zoubga texdem yiwet n tmeγra anda i d-tenced iεeggalen-agi n useqqmu aγerfan, iselwayen n kra n tγiwanin akked yimḍebbren n yiseqquma n tudrin, ladγa tid yewwin arraz wis 2,3 d 4. Deg wawal i d-yenna win yettmeslayen s yisem n taddart n Zoubga dakken arraz-a ur d-yusi ara kan akka.’’taddart nneγ seddayen-tt yiqerra-ines meεna s lemεawna n yimezdaγ akken ma llan. Leqdic n taddart, yuγal-aγ d tannumi, wa yettağğa-tt i wa’’ Ma γef sser n waya d wamek teddunt temsal deg taddart n Zoubga, yenna-aγ-d Cheikh Bouha mi i t-nesteqsa deg taggara n tmeγra-a :’’newwi-d amedya γer yimγaren-nni nneγ n zik, zik qqaren-asen ṭṭemman. Mi iruḥ wa, ad d-yuγal wa acu kan lecγal n taddart teddun akken iwata. Nferru timsal deg tejmaεt, nessbedday-d yiqerra n taddart deg tejmaεt s tlelli d tugdut. Xas akka tura ṭṭaqa d ilmeẓyen i yeṭṭfen taddart, meεna nleḥḥu deg ubrid n yimezwura nneγ. Nexleq-d leqwanen s wayes tleḥḥu taddart : win ara ten-ixalfen ad ixelles. Yal axxam yesεa attafttar-a. lγaci ttqadaren-t imi d nutni i t-id-yesnulfan.’’ I usmekti, arraz-a azal-is 500 000 idinaren. Meεna mačči d tadrimt ara ten-awin : ad asen-bnun asenfar i asen-yehwan s wazal-a. Ihi, akken qqaren :’’win yebγan ad tizdig, yessezdeg iman-is.’’ I limer, ahat, ad tuγal Zoubga d amedya i tudrin n Leqbayel ?
Hocine M.