Yekker-as ussan-a Uḥraz n tẓegwa (Conservation des forêts) n waɣir n Bgayet i tedwilt n unadi d uḥsab n yigḍaḍ n waman yettɛeccicen i yellan di twilayt. Ama deg yiɣeẓran, isaffen neɣ uggugen, trezzu tsuddut-a yeqqnen ɣer ugama ɣer waṭas n yimeḍqan ideg nuḥen waman, s yiqeddacen-is, iɛeggalen n uẓeṭṭa n usiḍen n yigḍaḍ d yilemẓiyen n umussu asdukklan, txeddem-d arapul ɣef wacḥal yellan d igḍaḍ-a i yettɛeccicen, amek ttidiren d wamek fettin.
Dɣa, deg ukemmel n tigawt-is, yella Uḥraz n tẓegwa ussan-a yezrin di lemsaq n wasif Ageryun, deg usamar n Bgayet, ideg ɛerḍen wid iḥeḍren ad walin liḥala n yigḍaḍ-a n waman, ad ten-siḍnen deg wacḥal i d-qqimen. Ulama yewɛer akken ad tafeḍ leḥsab idetti, wanag ssawaḍen yirgazen n Uḥraz n tẓegwa ad sɛun tikti, neɣ ad sennden ɣef ufmiḍi i d-ufan. Kra seg yiɛeggalen n tddukkla « Oxy-Jeunes » i uḥraz d usnerni n tgemmi tagamant tamezrayt n Yiderginen, kkin deg warmud-a n usiḍen i d-yellan lqaɛ n wasif Ageryun, gar tɣiwant n Suq Letnin d tin n Melbu.
Ad d-nesmekti d akken tigawin-a n usefqed d usiḍen n yigḍaḍ yettɛeccicen, llant-d taggara-a i lmend n wass amaḍalan n yigḍaḍ imhujar, i d-yettuɣalen deg 10 maggu n yal aseggas. Tura akka, akken i d-tewwi teɣbalut-nneɣ, mazal tettkemmil tigawt n usiḍen n yigḍaḍ n waman, seld mi d-yeḍra usihar-nniḍen deg uggug Iɣil Amda, i d-yezgan di tama n Xerraṭa. Tuffɣiwin-a n usiḍen n yigḍaḍ, ttilin-d tanezzayt maḍi, tikwal ɣef 05:00, acku imir-nni i ttemsegrawen s waṭas deg yimeḍqan-nsen ideg caḍen waman. Ugar n wid yekkin s wudem unsib deg uqeddic, llan wid yettruḥun akken kan ad walin, neɣ ad ɛiwnen ma zemren.
M. K.