Llan sin yiεeṭṭaren akken kan i ddukkulen. Seg wakken myeḥmalen aṭas, uγalen am sin n yiḍudan ufus, ula d lwaεda mi asen-d-tettunefk, wa ittbuddu wayeḍ s uḥric yelhan. Ɣas akken lḥif, yetbeε-iten, meɛna γelben-t s tayri i yellan gara-asen. Yewweḍ-d lajel n yiwen seg-sen, yemmut. Yeqqim-d wayeḍ d ameḥzun weḥd-s. Lexyal n urfiq, yezga di yal amḍiq. yettmekti-d leḥmala-nni d teḍsa-nni i yellan zik ansi ara d-tekk ?
Yiwet n tikkelt, ileḥḥu a-t-aya yemlal-d yiwen uεeṭṭar meẓẓi fell-as, yenṭeq-d γur-s: « Mselxir ».
Yerra-as: « Mselxir ». Aεeṭṭar ameẓyan: « Ma ulac uγilif, bγiγ ad dduγ yid-k xersum ad nemwanas ». Aεeṭṭar-nni, yemmekta-d bab-is, yuγal yeqbel. Ddukklen di sin, armi d tameddit, nsan di lğameε n taddart. Yiwen n umγar yewwi-asen-d imensi ad ččen. Yessers-d gar-asen taqedduḥt n zzit, tayeḍ n tazart d teḥbult n uγrum. Akken kan yeffeγ umγar-nni, aεeṭṭar-nni ameẓyan, yemmeγ γef yiniγem-nni yelhan. Dγa argaz-nni ameqran, yemmekta-d tayri i iruḥen, yefhem belli ur d-tettwaγram, yeḥbes lmakla.
Aεeṭṭar ameẓyan: « Ayγer akka? »
Argaz: « Ečč kan s tezmert-inek, nekk ṛwiγ ».
Tasebḥit, yenṭeq urgaz γer uεeṭṭar ameẓyan: « Ay arfiq ». Anεam.
Ruḥ ad isahel Ṛebbi fell-ak, nekk d awḥid ara kemmleγ.
Yahia Yanes