Zerrin tεeddin wussan, akud deg ubrid-is yettazzal, ma d ayen nettidir yal ass, yettuɣal d aktayen, d ismektiyen, gar-asen wid n lεali, wiyaḍ diri-ten. Am teqṣiḍt n Ṣunya, yiwet n tlemẓit n At Smaεel, i ifernen tamettant ɣef nnif d yiseɣ-is, wala tudert n ddel. Mraw n yiseggasen i iεeddan yakan ɣef tmettant-is, lameεna ulac win i tt-yettun, ulac win ur nesli s tedyant-is. Dɣa, ula d wid yellan d imecṭaḥ imir-n, ḥkan-asen yimawlan-nsen tamsalt.
Amek ara tt-ttun yimezdaɣ n taddart n At Smaεel! Nettat i yuran isem-is deg umezruy s yisekkilen iwṛaɣen, nettat i yellan d azamul n tebɣest, nnif d terbiyya. D yiwet n tuḥdiqt, tuḥrict, ama deg tɣuṛi-s, ama deg tudert-is. Ass n 26 di fuṛaṛ 2009, d ass amcum ara yeqqimen d asmekti i yimezdaɣ n At Smaεel s umata. Ass-n am ussan akk, tekker-d Ṣunya tucbiḥt, truḥ ɣer uɣerbaz i wakken ad tɣeṛ, nettat ur teẓṛi ara belli d win i d ass-is aneggaru di ddunit. Teɣṛa almi tekfa timsirin-is, teffeɣ-d ahat s lxiq d ccuq ɣer yimawlan-is.
Lameεna, yiwen n uqcic seg twacult-is, yella yettεassa-tt sdat uɣerbaz, imir-n yewwet-itt s ujenwi, yenɣa-tt. Ad d-nesmekti d akken, aqcic-a ixuṣ deg leεqel, llan wid i d-yeqqaṛen yedderwec, daymi i yexdem ccɣel-a. Ma yella ɣef tmentilt n tmenɣit-a, d aqcic-a i yellan yettabaε Ṣunya, yessutur-as ad ten-yecrek wassaɣ n tayri. Aredmani, taqcict taneglust, tuḥṛict, tesεa imir-n ala 15 n yiseggasen, dɣa tugi ad as-teddu di lebɣi, acku d yelli-s n laṣel i tella, d taḥuṛṛit, d tin yefkan azal meqqṛen i tɣuri-s, yerna tegza aṣaḍuf n tudert. D tidet, Ṣunya temmut, lameεna deg wulawen-nneɣ mazal-itt tedder, acku ayen i texdem ad yili fell-as d anagi i lebda. Rnu i waya, ad tili d amedya i teqcicin meṛṛa, d akken tin yemmuten ɣef nnif-is, ad tedder i lebda.
K.K.