Imi d Mulud Mɛemmeri i d-ineǧǧren abrid n uselmed n tmaziɣt s wudem atrar, ladɣa s tjerrumt, nesteqsa yiwen gar yiselmaden imezwura n tmaziɣt deg tesdawit ɣef wamek i ilaq ad yili useḥbiber ɣef tutlayt i wakken ad temneɛ seg nnger. Ha-tt-an tririt-is. ‘’Tamaziɣt, ass-a, amzun tettwakkes-d seg yimi n tatut. Awal-a, riɣ-t d tasemɣert i yimenza-nneɣ i yegren aẓru amezwaru i usenfar n tegert n wammud d usetrer d usimer n tussna d tmussnin uɣref. Syin akin, akin i wayen i d-yettwagemren seg tmussni n yimenza, akin i tikli –tewwi azgen n lqern aya deg usekles d usetrer d usnulfu deg tussna akked tsekla, akin i unekcum n tmaziɣt deg tesdawit d a tessaweḍ deg taɣult n tsekla tatrart (ungal, tullist, arrazen yettfuktin deg kra din n temnaḍin), amzun, melmi kan,yettunefk-as i tutlayt-nneɣ ad tili d tutlayt tunṣibt deg snat n tmura (Lezzayer akked Lmerruk).
Akin i wayen yellan yakan d tisuddwin (tisegwin deg tesdawiyin, HCA, CNPLET, CRLCA, takadimit), tessaweḍ ad tekcem deg UgrawAferkan n Tutlayin (ACALAN), s timmad-is d tutlayt yettwasawalen gar tilas n wayen din d timura n Tferka Ugafa akked Ddaw Tneẓruft. Yettkan-d amzun tagnit-a iɣer tessaweḍ akka, d tiziwar tuɣalin. Maca aẓayeri i as-yettunefken, urɛad i d-yeflali deg ugni n tilawt, yeqqim d awal kan.Yessulef ad tili yiwet tsertit n tidet i usebded n tutlayt, i usefrek n tutlayt ara yilin d tasalelt iwatan i usenfali n yiḥulfan d tektiwin n tmeddurt tamirant, ara yeddun akked tallit deg nettidir ass-a.
Yessulef ad tili tsertit tazeddgant ara as-yessiɣen ugar n yiberdan (tarrayin), ugar n wallalen, i unegmu n tantaliwin deg yal tamnaḍt, i usdukel n yirman imaynuten yettsemminin aktayen, i ufares n yizmamen iwatan tallit-nneɣ (tasekla tatrart, tiẓuriwin timiranin, isura, izmamen n wurar i yimeẓẓyanen), i tikci n wazal n uselmed deg yiɣerbazen akked tsedawit.Yessefk daɣen – d ayen i d-neqqar yal mi aɣ-tettunefk tegnit―deg yal aswir n tmetti ad as-rren azal s timmad-is d tutlayt n tmurt-nneɣ, ad tt-qedcen i waken ad tefrek, ad tt-sqedcen, ad ssenfalayen yis-s tikta n uzeṭṭa n tegmat akked yizerfan n umdan, ad d-skeflen tamussni n Yimenza, ad tiẓid tussna n uzekka, ad tiẓid tudert, ad tizdig tegnewt iluɣen(tignewt tanemettit, tignewt tasertant, tignewt tamnezwut)’’.
Yesteqsa-t Hocine Moula