«Azal n tumast (tamagit) d umezruy deg yisefra n L. Matub », d asentel i ɣef i d-yewwi awal Busetta Sufyan, d anelmad n duktura deg tesdawit n Tbatent 1. Yemmeslay-d deg usarag-is ɣef wazal n tumast deg yisefra n Lwennas Matub i tura Massa Racida Fitas deg yidlisen-is. Ɣef wakken i d-yenna « Ad naf tumast, tebḍa ɣef kraḍ n wanawen, yal yiǧ yessenɛat-aneɣ-d tikti ɣef tɣawsa. Maca nečni, ad d-nutlay ɣef sen n wanawen : Tumast n uɣlan d tumast n yidles ». Ɣef leḥsab n Mass Busetta, « Tumast n uɣlan, d tumast i yefkan azal i uɣlan n umdan, anda ara naf amedyaz-nneɣ ula d netta yefka azal i wanect-a, am deg usefru ‘’Aǧazayri’’. Ma d tumast n yidles teqqen ɣer tmiḍrant n yidles i yellan yettili d tulmist n tmetti seg tmettiyin. Tettbedda srid ɣef tutlayt, acku d nettat i ibennun idles n yimdanen deg tmetti, anda ara naf amedyaz-nneɣ ula d netta, am usefru ‘Gar yidurar n Luris’’ neɣ ‘’Selɛeb-itt ay abeḥri’’. Am wakken ara yessegzi-d ɣef ayetma-tneɣ ‘’Twareg’’ deg usefru ‘’Ay arrac’’ mi i d-yenna « seg Uheggar alamma d Aṭlas ». Seg tama n umezruy, iwala unelmad n tesdawit n Tbatent d akken « Amezruy, d agraw n tedyanin. Tidyanin-aya, ttilint zrint, netteqqen-ihent di ja-asent bac ad nessen aṣaduf n tmeddurt d tilawt i yedder umdan d ugzay n yimir neɣ bac ad neṣka yimal. Anda ara naf amedyaz-a, yessegzi-d ɣef wanect-a, am deg usefru ‘’Ay izem’’, anda i d-yemmerslay ɣef Yugurten asmi i d-yenna ‘’Agdud n Yuɣerten’’. Daɣen deg usefru ‘’Ferḥat d Ɛmiruc’’ anda i d-yessegzi ɣef wazal i fkan i yizmawen-a ». Ɣer taggara, yufa belli « Yessemres Matub deg yisefra-s tumast, yerna yefka azal i tumast n ugdud azzayri. Yutlay-d, daɣen, ɣef umezruy n tmurt n Lezzayer akked yimdanen n tmetti n lweqt-nni. Ihi, deg taggara, ad d-nini Lwennas Matub, yura ɣef talsa ».
H. M.