Am yal aseggas, tettheggi-d tddukkla tadelsant Tarwa n Gaya n taddart Rǧawna, deg lwilaya n Tizi Uzzu, temsizzelt taɣelnawt n ccna amaziɣ. Deg tezrigt-agi tis 11 anda llan ugar n 110 n yimekkiyen, ufraren-d 15 deg umyezwer amezwaru i d-yeḍran deg waggur n yulyu iɛeddan. Syin akin, teḍra-d temsizzelt n uqbel n taggara i 15 n yilmeẓyen-agi imezwura i d-yellan ass-nni n ssebt, 3 deg ɣuct 2018, deg tzeqqa n tmeɣriwin n Uxxam n yidles Mulud Mɛemmri n temdint n Tizi Uzzu.
Gar 15 n yicennayen n “uzekka”, tefren-d teseqqamut n usenqed 4 n yimezwura ara yilin deg temsizzelt n taggara deg wagguren i d-iteddun anda ara ttekkin yilmeẓyen n tmurt n lezzayer i icennun s tmaziɣt, ama d tamẓabit, tatergit, tacawit, tacenwit, taqbaylit…atg. Tella-d tezrigt n tikkelt-a, d tajmilt i tcennaylt tameqqrant taqbaylit Malika Domrane.
Ad d-nesmekti belli aṭas n wudmawen i d-yufraren deg temsizzilin iɛeddan i texdem tddukkla-agi Tarwa n Gaya, i yeḍḥan d imezwura deg temsizzelt taɣelnawt n ccna n tedwilt “Alḥan Wa Cabab”, nezmer ad d-nebder Rezki Ouali, Celia Ould Mohand, Bilal d wiyaḍ.
Hocine Moula