Tameddit n wass-nni n lǧemɛa iɛeddan, 2 ɣuct 2019, temlal tasa d way turew deg uɣerbaz amenzu n taddart n Lemṣella, di tɣiwant n Yilula Umalu.
D tagnit ideg mlalen akk yinelmaden ɣer tama n yiselmaden-nsen ɣer tama diɣ n yimawlan-nsen. Ala acmumeḥ d lferḥ i d-yettbanen ɣef wudmawen, ma d ilsawen ur cuḥḥen ara i uqessar d usmekti n wayen sɛeddan akk yinelmaden yeɣran deg uɣerbaz-agi. Tebda tfugla-agi i d-yettwasuddsen i lmend n yinelmaden n taddart-a, i d-yufraren deg yikayaden-agi unṣiben (Aswir wis 5, BEM akked BAC). Mbeɛd awal n tazwara, n uselway n tddukkla tadelsant Tiɣilt, i d-iheggan leqdic-agi. Yesseḥres deg umeslay-is ɣef wazal n usebɣes n yinelmaden-agi d usirem n umecwar aɣezzfan di leqraya-nsen.
Ttwaferqen warrazen d yigerdasen n usebɣes ɣef merra yinelmaden n taddart-agi i d-yufraren s yigemmaḍ yelhan deg tlata ikayaden unṣiben i useggas-agi aɣurbiz 2018/2019. Fkan azal n 12 n warrazen, 7 seg-sen i yinelmaden i d-yewwin akayad n uswir wis 5, 3 n warrazen-nniḍen i yinelmaden i d-yewwin akayad n BEM ɣer tama sin n warrazen i yettunefken i wid i d-irebḥen akayad n BAC.
Am wakken diɣ i d-llan kra n leqdicat idelsanen-nniḍen ɣer tama n ufraq n warrazen-agi. Ad d-nesmekti kan belli d taddart n Lemṣella i d-yettheggin yal aseggas tameɣra n tbexsisin, maca tezgel tazrigt n yilindi, tili ara d-yilin d tis 12. Ma d tazrigt tis 13, ad tili aseggas-a ussan n 29 d 30 ɣuct 2019.
Adaoun Ghani