Macahu tellemcahu, ad tt-yeḍbeε Ṛebbi d asaru. Qqaren yiwen wass yekcem ccluc ɣer lɣella n lḥemmeẓ. Ihi yezdeɣ deg yiwet n tεeqayt. Yebda la tt-itett, bab n lɣella, yeddem-itt ɣer tessirt i wakken ad t-yeẓd. Ccluc, yelha d ccɣel-is ur yeẓri acemma. Asmi yemmar lḥemmeẓ ɣer yiɣuraf, ccluc iffeɣ-it leεqel, anda ur yezmir i kra, acku iɣuraf mi ara berrnen tezzin, rqiq ṭṭmaε di leslak. Seg zzher meqqren n ccluc, aεeqqa-nni deg yezdeɣ, yemneε seg yiɣuraf. Yedda d ukerfa, yeslek ccluc seg wanda ur idmiε kra.
Dayen i t-yewwin s axxam-is s lxuf d tazzla n usawen. Mi iwweḍ γer uxxam, la sen-d-iḥekku tadyant-is. Bdan leḥbab, keccmen-d ɣur-s i wakken ad as-ḥemden leslak-is, qarren-as: “ Lḥemdu Llah mi temneεḍ a ccluc, awi-d kan imi yeslek uqerru-k”. Armi d yiwet n tikkelt, ccluc deg-s ashetref n lefqaε n yiγuraf-nni yecban idurar, yenna-asen: D tidet, awi-d kan imi selkeγ, meεna limmer ad d-teẓrem zzhir-nni.
Yahia Yanes