Taggara n useggas aɣurbiz ɣef tewwura. D tallit n yikayaden i d-yeṭṭafaren yal anelmad deg uswir-is. Maca, am waken i nwulef, yal aseggas yettawi-d amur-is n yiɣeblan d tḥiliwin I d-yettakken yir udem I uɣerbaz azzayri s umata d yigerdasen beddemma. Seg yiseggasen n 90 asmi akken ttmenṭaren yikayaden n l’BAC deg ubrid di tmanaɣt, tukerḍa d usewsex n uɣerbaz yuɣ aẓar di tmetti almi yal tikkelt s umur-is. Aseggas-a, taneɣlaft n Usegmi Nouria Benghebrit terra lwelha-s s agejdur-a iwumi tebɣa ad tegzem iẓuran. D acu kan yiwet n tfirellest ur tezmir ad teg tafsut. Ihi, tger tiɣri I wid yeṭṭfen iḥricen d ttawilat ara yerren ẓẓerb I taluft-a iwakken ad d-rren lhiba yesɛa yakan uɣerbaz azzayri. D Nordine Bedoui, aneɣlaf n Daxel I d-yerran I usiwel iwakken ad d-yili di lmendad I tin yerza uɣilif n leqraya. Aṭas n yimessulta I d-yessewjed iwakken ad ɛassen di yal tama n tmurt iwakken ad ɛeddin yikayaden-a di teswiɛin igerzen. Ɣer tama n waya, d taneɣlaft n lbustat d ttawilat titiknulujiyin tatrarin Houda Ferɛun I d-yernan iẓid-is ɣer tsirt n useggem d useqɛed. Imi azal n umelyun n yinelmaden ara yesɛeddin akayad n l’BAC, ḥala ttawilat ifazen I izemren ad rren lebla. D ayen yeǧǧan taɣlift n lbustat tessewjed-d kra n ttawilat ara icebblen asexdem n “les portables”. Wigi d ttawilat yessexraben ayen iwumi neqqar “les ondes électromagnétiques des téléphones portables”. Si tama nniḍen, Benghebrit tefka-d lwelhat i yimḍebbren terza temsalt n yikayaden iwakken ad menɛen inelmaden ur keččmen ara ɣer tzeɣwa mbeɛd 08h30mn. D ayen ara yeǧǧen mebla ccekk akayad ad yesɛu azal.
Radia. B