«Timunnent n Lezzayer ad tili deg tugdut, deg uqadar n tlelliyin, aqadar n teɣdemt tanmetti, deg uqadar n umgarad asertan d udelsan yebnan amussu n tlelli taɣelnawt. Ur nwiɣ ara xemsin n yiseggassen mbeεd, mazal la nettnaɣ akken kan ad nidir ». Ilul Ḥucin Ayt Ḥmed ass n, 20 ɣuct 1920, deg At Yaḥya di Tizi Uzzu. Deg leɛmr-is settac n yiseggasen kan mi yekcem ɣer Ukabar n Uɣref Azzayri (PPA) deg-i d-yufrar akken ad yuɣal deg 1948 ɣef uqerruy n Tuddsa timeẓlit (OS) deg umkan n Muḥemmed Belwezdad anda i d-yessebgen d akken ala amennuɣ s leslaḥ ara d–yawin i ugdud ayen yebɣa.
D aεeggal n tesεa n yimḍebbren n (FLN) i isekkren tagrawla n umenzu n unbir 1954 mgal acengu aṛumi anda yella seg wid yessawalen ɣer tdiblumasit , seld tanṭagt mgal lpusṭa n Wehren deg umenzu n magu 1952. Yerza ɣer Maṣer segmi ttnadin fell-as yimḍebbren irumyen. Rebεa n yiseggassen mbeεd, tewweḍ temsalt n Lezzayer ɣer l’ONU. Yettwaṭṭef deg tmesriffegt n Merruk anda yella usarag n teywalt deg 1956. Seg lḥebs i d-yessuter talalit n GPRA.
Deg useggas n 1962, seld timunnent n Lezzayer, yebḍa Ḥucin Ayt Aḥmed akked yimḍebbren n (FLN) ur nquder ara imenzayen n tugdut ara iseddun tamurt. Ɣef wakka dɣa ara d-yeslal, deg useggas n 1963, Tirni n yiɣallen inemlayen (FFS), akabar n tenmegla amezwaru deg umezruy n Lezzayer. Deg useggas n 1964, yettwaṭṭef ɣer lḥebs, ḥekmen fell-as s lmut, maca yerwel-d si lḥebs Lḥarrac akken ad yenfu ɣer tmurt n Swis. Seld ineḍruyen n ṭuber 1988, yuɣal-d ɣer tmurt, maca iεawed yeffeɣ-itt seld lmut n umeddakkel-is n umennuɣ d tugdut Muḥemmed Budyaf deg 1992.
Sya ɣer da, yettuɣal-d. Ibedd-d ɣer tefranin n tselwayt deg useggas n 1999, syin yejbed iman-is netta d wiyaḍ imi, ɣef wakken walan, mačči d tifranin i izeddigen. Deg duğember 2012, yessawed-d i yimeɣnasen n ukabar (FFS) d akken dayen yejbed iman-is si tsertit. Yemmut Ḥucin Ayt Aḥmed ass n, 23 duğember 2015, di Luzan (Swiw), yeğğa-d amezruy, idlisen akked d tmurt i wid ara tt-yebnun s imenzayen n tlelli d tugdut.
Nisma Tigrine