Yidir Ayt Ɛemran d ameɣnas aqbayli, d amedyaz n tegrawla n Lezzayer. Aṭas i yekki s yisefra-s deg usaki n tefrit n Yimaziɣen. Yeǧǧa Tamurt n Yiqbayliyen deg yixef-is 8 n yiseggasen, seld mi temmut yemma-s Sekkura, yerza ɣer Tyaret. Ikemmel taɣuri-s d aɣrib, di tegnatin iweɛren, armi yessaweḍ yettwaqbel di tesnawit Bugeaud n Lezzayer.
Syinna, mi yesdegdeg unehras asɣur-a aɣurbiz, yekcem deg tesnawit n Ben ɛeknun. Kra n wakud aredqal, yufa iman-is akked kra n yirfiqen n tezrawin, gar-asen Laymac Ɛli, Ḥusin Ayt Ḥmed d Ɛemmar Uld Ḥemmuda, ukud i d-yesnulfa taɣessa iǧehden n yimeɣnasen iqbayliyen deg umussu aɣelnaw. Yennuɣ abeɛda deg umussu i usṭeɛref s uzref d tillit n uɣref amaziɣ di Lezzayer.
Yewwi-t waya ad yaru, deg yennayer n useggas n 1945, imseɣret yettwassnen « Kker a mmi-s n umaziɣ », seg tayri i yesɛa i Tmazɣa s umata akked ɣef taluft n Umaziɣ i yettwastɛemren deg wakal-is. D acu kan, daxel n PPA-MTLD, yettwasṭaxer sɣur Messali Ḥaǧ, ɣef ssebba mi yekkat ɣef tmaziɣt d temmuzɣa. Mi d-yewwi Yidir Ayt Ɛemran akayad n BAC deg tusnakt, ijerred iman-is deg tensafart (pharmacie) n tesdawit n Lezzayer. Syinna, ḥettment-t tegnatin ad yeǧǧ aqeddic-a, ad yuɣal armi d Tyaret ideg yufa amḍiq d imḍebber n tsuddut.
Seg useggas n 1956 armi d 1958, yekcem di lḥebs mi as-babben tiyita deg tɣellist taɣelnawt. Mi d-yeffeɣ, yesɛedda akayad n turagt deg tsekliwin tiɛrabin i yella yakan yettheyyi mi t-tuɣ deg tkurmut, di Wihran. Dɣa, yuɣal di Tyaret d aselmad n tutlayt taɛrabt deg cutember 1962. Yella di kra n wakud d amazan di tama n Tyaret, syin yejbed akk iman-is seg tsertit deg 1965.
Maca, mi as-d-yella wugur d Ɛebdlkrim Benmeḥmud, aneɣlaf n usegmi aɣelnaw, yuɣal i warmuden idelsanen. Seg ukabar n FLN, yekcem deg tenmehla n RCD, ideg yettwasemma d aɛeggal n Useqqamu aɣelnaw. Ugar n timmeɣnest-is ɣef tmaziɣt di tallit n tegrawla mgal Fransa, yella Yidir Ayt Ɛemran d aselway n Useqqamu Unnig n Timmuzɣa, seg 1994 armi yemmut deg 2004. Ilul Muḥend Uyidir Ayt Ɛemran deg meɣres n useggas n 1924 deg Tqidunt, tama n At Wasif. Yewweḍ lebda deg tuber 2004.
M. K.