Tiddukkla tadelsant Tigejdit n Tmussni n Tizi Rached, ad d-theggi tazrigt tamezwarut n temsizzwert n tmacahut i warrac imeẓyanen, deg temkerḍit tagejdant n tɣuri taɣerfant n lwilaya n Tizi Uzzu. Yettili-d akka tura usersi n zzmam n uttekki neɣ n ujred deg temkerḍit tamaynut n lwilaya n Tizi Uzzu alamma d ass n 31 deg waggur n meɣres 2017, ass aneggaru n ujred. Deg-s diɣen ara d-tili tmeɣra n taggara ass n 25 deg waggur n yebrir 2017, s tukcci n yismawen n tlata n yiḍrisen ara d-yufraren. Acu kan, mačči d arrazen ara asen-yettunefken i wid-nni ara d-yifriren, maca ad yili usizreg n yiḍrisen-nsen deg yidlisen s wunuɣen, ɣer tezrigt Arts Plumes, d tririt-nsen deg uḍebsi (CD), imi ad d-tili turar-nsen ɣef usayes. I waṭas n yisalen, siwlet ɣer wuṭṭun-agi : 06 58 42 54 10 neɣ rzut ɣer tansa-agi : info_dz@yahoo. fr Aselway n tiddukkla n Tigejdit n Tmussni, Mass Laissaoui Amazigh, yenna-d i Uɣmis n La Dépêche de Kabylie : ‘’tikkelt tamezwarut ara d-teḍru temsizzelt yecban tagi deg wakal n lwilaya n Tizi Uzzu, imi nwala belli tella tin n tmedyazt, tin tullisin, maca ulac tin n tmacahut. Nessaram ad nili deg ttiεad, mreḥba akk s yimyura-nneɣ».
Amazigh Ghani