Yal mi ara yemmet yiwen, ḥezznen fell-as wid i t-yessnen, ladɣa tawacult ideg i d-yekker. Ma d tamentilt tban. Yetteɣlay-d fell-as yimeṭṭi imi iruḥ i lebda, iɣab gar wallen, ur mazal ad yili akked wid i t-yennumen, i yezdin yid-s tudert s wayen merra i d-tettak.
Maca, neẓra nettwali amek tettbeddil teswiɛt ɣur yimawlan n win yemmuten mi ara zrin kra n wussan ɣef tmettant-is. Imi ttuɣalen-d amzun ttun-t ɣas ahat yezga deg wul d uqerruy. Meḥsub, ɣas ttmektayen-t-id, maca ur ttagen ayen ilaqen akken ad d-sbeggnen tilin-is daxel-nsen ulamma ulac-it sdat-sen. Aya, dɣa, yezmer ad yili s tirza ɣer uẓekka-ines seg teswiɛt ɣer tayeḍ, xersum tikkelt deg ddurt amek xeddmen kra n yimezdaɣ deg tama n Suq n Letnin, akken ad d-smektin win i ten-id-yeǧǧan, ad d-berzen timeqbert ma ufan deg-s agudu. Ad slemden daɣen tigawt-nni i yimecṭaḥ bac ad tt-xeddmen deg yimal ula d nutni. Acu kan, yesḥissif lḥal aṭas, mačči drus, mi tuget n yimdanen melmi ɛeddan 40 n wussan ɣef tmettant n ḥedd, neɣ uqbel ad ɛeddin, ur ɛeffsen maḍi akal n tmeqbert anda yemḍel amzun ur t-ttun d amuddur. Imi ma yella qqaren-d leḥzen deg wul, asmekti yessefk ad yili s tigawt, mačči s wawal kan. « Imawlan ur nettẓuṛ wid yemmuten cubaɣ-ten ɣer win inekkren aḥric seg yiman-is, yettu aẓar deg i d-yefruri neɣ yettu tara i d-yekkan seg-s. Lḥaṣun d tawaɣit ɣur-i! ». I aɣ-d-yenna yiwen s usḥissef. Tawaɣit tameqqrant d tin i ttagen yimawlan ur nettaru isem n win neɣ n tin i smetten deg uẓekka-s akken ad cfunt fell-as talliyin d tsutwin i d-iteddun, ur yettwattsaw ara. Am deg Ayt Smaɛel, mazal ar ass-a kra n yiẓekwan ur ttwarun deg-sen ismawen n wid i imeḍlen din, ɣef ssebba n ustehzi i d-yekkan sɣur yimawlan.
Ɣef waya, a win yufan ad d-dduqsen wid yeddren seg tuccḍa, ad fken azal i umattan s tirza d ujerred n yisem deg uẓekka.
Kaisa Khalifi