Lydia Guerchouh, d taɛeggalt n tesmilt n uktazal n Temsizzelt n usmuzzeɣ n twennaḍt, amwakken i tella diɣ gar wid i d-iheggan amawal n usmuzzeɣa n tedbelt. Nestaqsa-tt ɣef yisenfaren-a.
Telliḍ, kemm, deg teseqqamut n uktazal n Temsizzelt n usmuzzeɣ n twennaḍt. Awal ɣef wamek i tufam tamaziɣt deg unnar…
Lydia Guerchouh :Taseqqamut n uktazal n temsizzelt n usmuzzeɣ n twennadḍt, terra lwelha-ines ɣer usexdem n tmaziɣt deg yiberdan akked tedbelt. Ma nmuqel ɣer yizumal n temsizzelt-agi, ad naf s umata, tuddar akk ttwarunt s tmaziɣt, ahric-agi n uktazal, yessefraḥ aṭas imi d timexḍa tuddar ur nuri ara s tmaziɣt. Ma d aḥric n tedbelt, aṭas i ixussen deg-s. Tuget n yimezla i yellan di tɣiwanin ur urin ara s tmaziɣt. Nger tamawt daɣen ɣer tuccḍiwin n tira d umgarad n yirman/wawalen… D tamawin-agi i aɣ-yewwin dɣa ad d-nesbedd tasmilt i usbeddi n umawal n tedbelt ara yettunefken i tɣiwanin akken ad t-sɛunt d aɣbalu.
Aql-iken daɣen la d-tteheggim amawal n tdeblet. Amek i tettwaliḍ leqdic am wa deg usnerni n tutlayt tamaziɣt?
Tamaziɣt, tuɣal d tutlayt taɣelnawt tunṣibt di tmendawt, maca teqqim kan di lkaɣeḍ. Anagar aselmed-is di kra n yigezda, ur nettwali ara adeg-is deg unnar. Ihi, i wakken ad d-yili usemres n tutlayt-a, yessefk ad ilin yimahilen ara ineǧren abrid. Amawal n tedbelt i nra ad t-id-nessuffeɣ, ad yili, di tazwara, yerza kan ayen yellan di tɣiwanin d ugezdu. Ad yili d aɣbalu akken ad teddukkel tira d yirman n yismawen n yimezla d yinarayen. Aṭas n yiselwayen n tɣiwanin i yettraǧun amawal-a s ccuq akken ad qablen yis-s agdud i asen-d-yessuturen asemres n tmaziɣt. Iswi n umahil-agi, ad isekker tikti n usemres n tmaziɣt di twennaḍt, ad yeldi tiwwura i yimezla-nniḍen am tḥuna, tinsufarin, lbankat… Imi d lawan tura ad nessuffeɣ tamaziɣt ɣer berra, ad tili d tutlayt n usiwel di yal adeg, ɣef yal asentel.
Hocine Moula