Ǧǧan-t-id yimuzwura d awal, ttejṛa yiwet, iẓuṛan-is ṭṭuqten. Ihi akken ula d timetti taqbaylit, imi mgaraden wansayen deg-s, seg temnaḍt ɣer tayeḍ. Lameεna d amgarad-a, i as-yefkan i tmurt n yiqbayliyen ccbaḥa, sser d lhiba. Amenzu n ṛṛbiε, neɣ amager n tefsut, d yiwen n unsay i yesεan azal meqqṛen di tmetti taqbaylit s umata. Ayagi, imi lejdud sfilliten i lxiṛ s leεwayed i d-refden ula d nutni sɣuṛ lejdud-nsen. Meḥsub imi tafsut d tasemhuyt n yijeǧǧigen, ccbaḥa n ugama d ubeḥri zeddigen. Ula d nutni seg tama-nsen, ssulin di ccan-is, ttmagaren-tt s tẓiḍanin, ccna d ucmummeḥ. Seg temnaḍin i mazal ṭṭfent deg wansayen-nsent, ad naf tin n At Ɛebbas. Ladɣa deg wayen icudden ɣer tjaddit.
Γur tuddar n At Ɛebbas, amenzu n tefsut, d ass i yesεa lbenna weḥd-s.Neɣ d ass uzzig n tuffɣa n tlawin d warrac. Tafejrit n wass, ad d-kkrent tyemmatin, ad heggint yal ṣṣenf n tuččit, am umeqful, ibawen iquranen, berkukes, timellalin d tuftiyin. Rnu ɣer waya, ad d-heggint tiqecwalin i warraw-nsent imecṭaḥ, deg-sent ggarent buhan n tẓiḍanin. Ula d tislatin timaynutin, neɣ tid mazal ur ddint, s umur-nsent. Mi kfant aheggi-nsent, ad cebbḥent iman-nsent, ad lsent tiqendyar ifazzen ɣur-sent, syin ad ffɣent ɣer teẓgi. Deg ubrid n tirza, teddunt, ttcewwiqent, cennunt. Mi ara leḥqent ɣer teẓgi, ttnejmaεent xeddment urar n lxalat. Deg teswiεt-nni, yettifsus uqerru gar tizzegzuyt n yimɣan, d ubeḥri yeṣfan.
Ayen i d-irennun i unnar ccbaḥa, d taḍṣa n warrac imecṭaḥ, i d-yeskanayen belli umren nezzeh. Gar n 5 d 6 n yisragen i sdεeddayent tullas dinna. Ula d lmakla-nni i reffdent, teddmen-tt-id mi ara llaẓent, ferrqent gar-asent. D tugniwin-a i nwala deg temnaḍin n At Ɛebbas s umata, gar-sent timlilit i d-thegga tddukkla Tiɣṛa n Tqurrabt. Taneggarut-a dɣa, tgerr-d tiɣri i tlawin n temnaḍt-nsen bac ad ḥeḍṛent i ttiεad-a. Meεna ayen yeṣṣefṛaḥen ugar, d tiɣri-s i tlawin i wakken ad d-llsent tiqendyar n Leqbayel, ad εellqent lfeṭṭa-nsent. D ayeb i yeǧǧan ttiεad-nsen yessmurres akken ilaq. I yissali, yeḥḍer ttiεad-a ula d anaẓuṛ Uleḥlu akked Massa Suεad.B, i yesseḥman taqeεet s ubendir. Di taggara, ad d-nekfu s wawal n yiwet n tmeṭṭut i aɣ-d-yennan: «Nefṛeḥ buhan ass-a, nessaram ad lhun wussan-nneɣ i d-iteddun. Bɣiɣ kan ad weṣṣiɣ arrac-nneɣ, d akken ilaq ad ḥerzen leεwayed-nsen, imi d wagi i d agerruj-nneɣ.
K.K.