Mbeɛd mi tekcem tmaziɣt idlisen, d nnuba n ttawilat nniḍen n tiknulujiya tatrart. Atan ihi ass-a, yal yiwen neɣ yal yiwet seg-wen, tzemrem ad tesɛum amawal n tmaziɣt deg tilifun-nwen n lǧib neɣ « apurṭabl » ; amek ? Yeshel maḍi, imi tzemrem ad d-tegrem baṭel ɣer tilifun-nwen n lǧib amawal n tmaziɣt yemmugen s talɣa n usnas (application) umi ssawalen : « Androïd » s ttawil n lantirnat. Amawal-a asnutlayan (bilingue) tafransist/tamaziɣt, tamaziɣt/tafransist, ad tafem deg-s azal n 35000 n wawalen n tmaziɣt akked yinumak-nsen s tefṛansist ; ijemmel-d aṭas n wawalen ama d wid n teqbaylit n yal ass n usegzawal (dictionnaire) n Jean-Marie Dallet neɣ amawal (lexique) n tmaziɣt tatrart i yexdem Dda Lmulud. Aya mebɣir imawalen nniḍen i d-yeffɣen taggara-ya. Asenfar-a yesɛan azal d ameqran, imi yeldi abrid i tmaziɣt akken ad tekcem annar n tiknulujiya tatrart, i as-yellan i lmendad d Tasbeddit (fondation) Tiregwa n tmurt n Kanada s lemɛawna akked Tesbeddit « Tawalt » n tmurt n Libya iɣef yella i lmendad umeɣnas ameqran mass Medɣis Umadi. Tasbeddit Tiregwa, tessaram dakken amawal-a d win ara iɛeǧben, d win daɣen ara i nefɛen imazɣawalen merra d kra n wid yebɣan ad lemden tamaziɣt. Ilmend n waya, iɛeggalen n Tesbeddit Tiregwa ssuturen seg yimdanen akken ad zzuzren amawal-a neɣ ad t-ssisnen ladɣa deg yiẓeṭwan imettiyen (les réseaux sociaux) am facebook, twitter d skype. Am wakken daɣen i ssuturen seg yal yiwen (yiwet) afus n lemɛawna ladɣa s tedrimt ilmend n yisenfaren imaynuten nniḍen yerzan asekcem n tmaziɣt di tsenselkimt (informatique) d tiknulujiya n yisallen ara xedmen deg waguren i d-iteddun. Ma d amawal n tmaziɣt i tzemrem ad t-zedmem (télécharger) baṭel s ubrid n lantirnat, ad tafem akk ttfaṣil ɣef tarrayt (methode) ara tḍefrem deg wadegen : www .tamazgha.ca akked www.tawalt.com.
Mokrane Chikhi