Deg ussan yakan imezwura n wagur n dujember i nnejmaεen yimḍebbren n Tdukla n Yimaziɣen n Fṛansa yellan di Épinay-sur-Seine (Lpari), akken ad heyyin i tmeɣra n Yennayer. Deg wahil i d-tessewjed tdukla-ya yellan daɣen d taεeggalt deg Uzday n Yimaziɣen n Fransa (Coordination des Berbères de France) ad naf tameɣra ara d-yilin di tzeqqa Espace Lumière ( Épinay-sur-Seine). Tameɣra-yagi ara d-yilin deg wass n umenzu n Yennayer (ass n lḥed 12 janvier 2014, ɣef 14h30), ad cnun deg-s: Tarbaεt n Les Chikhi (Djamal d warraw-is), Amirouche, am wakken daɣen ara d- yili deg-s cḍeḥ n tullas, d waṭas n leqdic-nniḍen i icudden ɣer yidles amaziɣ.
Ma yella d tidukla n Yiwaḍiyen n Fransa, iεeggalen-is bɣan akken asfuggel n Yennayer n useggas-a, ad yili d tagnit akken ad d-jemεen tadrimt ilaqen ilmend n uεiwed n lebni n lemqam n « Yemma Weḥmida Ḥenna » yellan di lεerc n Yiwaḍiyen. Iswi n lebni n lemqam-agi, ɣef wakken i aɣ-d-xebbren yiεeggalen n tdukla : » d aseḥbiber ɣef leεwayed n tidet n yimezdaɣ n temnaḍt n Leqbayel s umata s lxuṣus imezdaɣ n lεerc n Yiwaḍiyen ». Γef demma n waya, tidukla n Yiwaḍiyen n Fransa, theyya-d yiwet n tmeɣra ara d-yilin deg wass n 11 yennayer 2014 deg uxxam n tɣiwant 20eme Arrondissement, place Gambetta (Lparis). Tameɣra-yagi, ad cnun deg-s yitran n tezlit taqbaylit: Madjid Soula, Idir, Mourad Soummam d tcennayt Taoues. Am wakken daɣen ara tili tɣuri n yisefra sɣur amedyaz Mohand El-Houcine, am wakken daɣen ara d-yili uskan n yiselsa iqdimen n temnaḍt n Leqbayel. Mebla ccek, ad ilint aṭas n tdukliwin timaziɣin n temnaḍin-nniḍen n Fransa, i yettheyyin leqdic ilmend n umager n umenzu n useggas amaziɣ Yennayer 2964, ahilen n tdukliwin-agi ad binen deg wussan-a i d-iteddun.
Seg Lpari Mokrane Chikhi