Ass n ssebt 19 deg yunyu, theyya-d tdukkla iwumi qqaren « Tidukla n bab lxir » n taddart n Wayt Sidi Ɛli, s lemɛawna n kra n tdukkliwin-nniṭen n Yiberbacen am tidukkla n « Yitri n waddal », d « tidukkla n les beaux arts d’Ait Sidi Ali » d tiyiḍ, yiwet n ssehra s wahil d amerkanti i lfayda n yimezdaɣ n taddart-a ladɣa wid yenḥafen. Tameɣra, tella-d deg tzeqqa n tmeɣriwin n Umeɛraṭ i asen-d yefka Mass Smaɛil BENƐEBBAS beddema i usɛeddi n ssehra-yi yebdan seg ttesɛa n yiḍ almi d zzuj n ssbeḥ.
Ssehra tebda s usreḥeb s yimencaden i d-yettwancden ɣer tmeɣra-ayi seg twaculin n yimeṭharen, d yinelmaden i d-yufraren deg « bac », akked yiɛeggalen-nniṭen yeḥemlen ad gen lxir. Deg tazwara, bdan s yiṭebbalen i-d-wwin akken ad sferḥen arrac-nni iwumi xetnen, seld mi i asen-fken arrazen i yimawlan-nsen. Syin, kemmelen s tceqqefin n umezgun n warrac imeẓẓyanen i d-theyya « terbaɛt n Ufennan » s wacu ferḥen, uraren, ḍsan akk warrac iḥeḍren din. Amud n warazen yeẓel ula ɣer wid i d-yewwin akayad n wis semmus deg uɣerbaz amezwau akked « bac » aseggas-a deg tsenawit n Yiberbacen i tlata n yinelmaden i d-yufraren s yigemmaḍ ifazen. Tidukkla-yi daɣen, ur tettu ara ad tkerrem wid i as-d-icebeḥḥen udem-is i taddart n Ayt Sidi Ɛli d ilemẓiyen-is yetturaren « cciṭrunj » imi i d-ufraren deg temzizelt taɣelnawt, d nutni i d-yewwin arraz amezwaru ; wid-a d : Ɛedwan Salma ; Ixlef Maya ; akked Xeladi Lyas. Ɣer taggara, seld tagnit n zehhu i d-tga terbaɛt n yiṭebbalen, tidukkla n bab lxir, tefka arrazen i yal yiwen i asen-d-yefkan afus n lemɛawna ama i nutni srid ama i yimeɣban iɣef qeddcen ; am tdukkliwin yemxalafen n temnaḍt n Yiberbacen yecban : « Tidukkla n les jeunes d’Irman », tidukkla n « Yitri azeggaɣ n Yiberbacen », akked « tdukkla n Ufennan ».
S wakka, ɣas akken tidukkla-yi mačči aṭas-aya i tebda leqdic-is, imi tebda kan deg wayyur n mayu n useggas-a 2014, lameɛna tessaweṭ ad theyyi yiwen wahil s wazal-is. Iswi-nsen meqqer ur iḥebbes ara kan deg wayen igan segmi i d-tebda ar ass-a ; akken i aɣ-d-yemmeslay uselway n tdukkla-yi Mass Tabia zahir ɣef wahil n tdukkli-ya aṭas n tirmad i d-sswejden ad ttwaxedment daɣen deg teɣzi n wussan i d-iteddun : » … deg useggas-ayi n 2014 nessujed-d kra n leḥwayej, nessaram ad nelḥeq ɣer-sent akk, gar-asent :
– aɛiwen n kra n wid yenxessen s tedrimt d kra n wayen iwumi nezmer i qufat ramaḍan, d lɛid balak ahat s luziɛa, syin aheyyi i tuɣalin ɣer leqraya ;
– tirza ɣer kra n sbiṭarat i zzyara n yimuṭan akked d uxxam n yimɣaren deg wussan-a n leɛwacer ;
– aheyyi n tmeɣra n zzwaj i tmanya n yilemẓiyen n temnaḍt-a, wid i yeɛeddan rebɛin iseggasen, ur nsekfi ara, ara d-yilin deg wayur n ctember i d-iteddun dima deg tzeqqa n tmeɣriwin n Ben Ɛebbas … ».
Seg tama-s Masa Dihya Leɛmrani (i yeṭṭfen amṭiq wis sin ddaw n uselway n tidukklayi) tesbeyen-d lferḥ-is imi ssawṭen ɣer yiswi-nsen ɣas akken s leɛtab maca ɣer taggara sferḥen aṭas n wid yenxessen, rran-asen-d asirem n tudert s wayen igan ass-a.  ,; atg.
S wakka, bab lxir nessaram-as ad yeqqim d bab lxir, nessaram-asen afud ijehden deg wayen yeqqimen deg yisenfaren-nsen d wahil-nsen ladɣa deg ubrid-a fernen. Nessram-asen tabɣest neɣ lkuraj i yal win i ttikin deg twizi-ayi n lxir, ladɣa iɛeggalen n tdukkla-ayi iɛetben mliḥ mliḥ deg yixeddim-nsen ; d acu kan iban-d leɛtab-nsen ɣer tafat.
kania R.