Tidukla tadelsant « Idles n Wenẓul » (sud culture) n temdint n Marseille suddsen-d yiwet n tfaska n tmazɣa s teɣzi n 3 wussan, s yisem « Aẓawan Amaziɣ n Tefriqt Ugafa », deg tzeqqa n umezgun Sucrière n temdint-a. Tafaska tebda s usarag n yinebgi, Remḍan Iftini, ɣef usaru i d-yessufeɣ s lemεawna n umsufeɣ Sami Ɛellam, ɣef tcennayt Ḥnifa, asaru iwmi qqaren « Ḥnifa tudert yerɣan ». Asaru-agi, iḥekku-d ɣef umecwar i d-tewwi Ḥnifa d wuguren i d-temlal deg tudert-is. Yella-d awal daɣen ɣef uẓawan azzayri s umata.
Deg wass wis sin n tfaska, yella-d usaru n Camy Cemmini, d asmekti ɣef umecwar i d-tewwi terbaεt n « Abranis » i d-ilulen deg useggas n 1967. Ccna-nsen yennul ugar n temsal deg tmetti (tayri, idles, tamaziɣt, atg. )
Taggara n tfaska, tella-d yiwet n tmeɣra meqqren deg tzeqqa n umezgun « la Sucrière » anda cnan yinaẓuren iqbayliyen gar-asen Malika Dumran, Izga, Ɛli Ferḥati.
Islam Bessaci