Akka ihi, mazal kra n wussan kan i lɛid ameqran. Tiwaculin dagi deg tama n yimceddalen tt-heggin-t akken zemren-t i lɛid-agi. Maca, yewwi-yaɣ-d yillu, waqil aṭaṣ degsen-t ur zellun-t ara ikerri tikelt-a ! Dayen iban-en, acku suma n yikraren tewweḍ ar yiwen waḥric, mači dayen i qebbel wallaɣ n wemdan ! Yuɣ lḥal, azgen ameqran n twaculin n tama n yimceddalen ur ṣiwiḍen-t ara ad aɣen-t ikraren, acku wigi ɣlay-it aṭaṣ. Amedya: Izimer kan atan yiwweḍ ɣer 3 imelyan deg leswaq, neɣ ɣer yimeksawen n tama-agi ! Akrar i ṣaḥan iweznen kra n 40 ikilugramen t-ali-ḍ d-asawen, yettnuzu ger 55000 d 70000 idinaren, ma drus ! Amek, ihi, bab n tawacult yettaɣen 25000 neɣ 30000 idinaren i wagur, ad yaɣ ikerri yiwḍen ar summat-agi? Ɣef ayagi, yenna-yaɣ-d yiwen n Mas: »Gma yuɣ-d izimer ɣer yiwen umeksa ixelleṣ-it s 4 imelyan. Wagi d-izimer kan ! Maca, gma ixeddem deg yiwwet n t’kubanit anda yettxelliṣ 60 000 idinaren i wagur. Ma d nek, ur d ttaɣ-aɣ ara, acku ur zmir-ɣ ara. » Akka iɣ-d yenna. Mas-agi yerna-d, s cwiṭ n teḍṣa: » Imi akka i tewweḍ suma n yikerri ar wazal-agi, ihi, ilaq kan ad n-aɣ idandunen (La dinde, ndlr), imi lɛid ilaq kan att-sizel-ḍ idamen ! ». Lɛada-agi n t’mezliwt, tuɣ « tiyita » i ṣaḥan, imi ayen din n twaculin ur tt-xedmen-t ara. Aṭaṣ degsen-t tt-xemimen-t ad aɣen-t kan cwiṭ n weksum, akken ad sɛeddin-t lɛid ameqran. Myal aseggas, « ṣṣef » n twculin ur n zellu ara yettnerni, imi tigellelt tewwi aṭaṣ degsen-t. Laɣla, laxlaṣ ur n gerrez ara, asufeɣ n tedrimt s lkutra,…d-ayagi yeǧǧa-n tiwaculin ur ṣṣawaḍen-t ara ad sɛeddin-t lɛid akken ilaq lḥal. »Anda llan laɛyud n zik, imi yal tawacult t-zellu ikerri, akken ferḥen warrac, akken tezha dunnit imiren ! Ma d tura, truḥ rriḥa n lɛid. As t-ini-ḍ d-as am wussan n yillu ! » iɣ-d yenna yiwen uqerru n twacult.
Syphax.Y