Ayen i as-yeḍran i Nora am teqṣiṭ-nni n yisura. Nora, d yiwet n teqbaylit i izedγen di tmurt n Fransa, si tama n Ile-de-France. Asmi tewweḍ 20 n yiseggasen di leεmer-is, tesla d akken argaz i tt-irebban mačči d baba-s n ṣṣaḥ. Yemma-s teskaddeb-as u tenna-as d akken baba-s iruḥ γer tmurt uqbel ad d-tlal. Nora, ur tnuda ara γef baba-s n ṣṣaḥ imi i d-tekker di tayri d lehna di twacult-a, d acu kan deg waggur n yebrir 2013, tufa yiwet n teṣwira anda i tt-yeṭṭef baba-s gar yifassen, imir tesεa aseggas deg leεmer-is. Din din tfaq s lekdeb n yemma-s u tebda anadi γef win i tt-id-yesεan. Tebda seg tedwilt-nni n M6, syin tnuda nettat n uselway n tγiwant Saint-Fargeau-Ponthierry anda akken yella ixeddem, zik, baba-s. Akka, dγa, ay d-ufan win i t-yesnen, yeεqel-it di teswira. Anadi ikemmel ula di tmurt, ladγa s rradyu. Deg waggur n furar 2014, yessawel-as-d εemmi-s, si tmurt, di tilifun. Syin ay tebda tikli armi d asmi mlalen : di tazwara s ttawil n Skype, syin d baba-s i iruḥen γer Fransa. Aseggas-a, d nettat ara d-yasen…
Hocine. M