“Idammen-nwen cemmεen amennuγ-nneγ γef tlelli, lweεd-neγ d akemmel deg yiseγ-nwen’’ Awalen-a, ttwarun s tefrensist deg tsebdadt i tga tγiwant n Tizi Uzzu s lemεawna n tiddukla n yineγmasen n Tizi Uzzu. Akka i bγan ad sen-rren tajmilt wid i d-yeggran i yineγmasen yemmuten : ladγa, wid-nni yenγa arebrab.
Amekkan-a, yefteḥ-it lwali n Tizi Uzzu Mass Abdelkader Bouazghi i lmend n leqdic i d-yettwaheggan γef useggas wis 60 n tegrawla n tmurt n Lezzayer.
I usmekti, amekkan anda tebna tsebdadt-agi tajdidt yella yakan seg yiseggasen-nni n 1990 : d aεawed i as-εawden akka tura, sqaεden-t akken iwata.
Mebεed asebdad n Matoub, arrac n tefsut taberkan, Djaout d wiyaḍ, tamdint n Tizi Uzzu la tettuγal d takatawt (mémoire) n tmurt n Leqbayel.
Hocine.M