Send iḍelli, 14 seg meɣres, i d ass aɣelnaw n yimeɛḍar deg tmurt n Lezzayer. Tidukkliwin merra, n tal tamnaḍt n yal aɣir, i yesseḥbibiren ɣef yimdanen-a imuḍinen sfugglent ass-nni s tumert akked wid terza taluft, maca daɣen s usirem-nni wissen ahat yewwas ad ttunefken i yimdanen-a at wasrayen uzzigen (besoins spécifiques) akk izerfan i yewwi-d ad sɛun deg tudert-nsen tayallast tuwɛirt. Ur d ameslay kan ɣef wuguren n ukcam deg tmetti, n tuffɣa, n uqḍaw n uqeddic-a neɣ d wa, imi sanda yerra umeɛḍur ad d-imager ugur. Maca daɣen, d ameslay ɣef uẓayer (statut) i as-d-isaḥen deg tmurt-is, skud tadrimt tamayyurt i d-yettawi d tin n menwala-tt almi aṭas, dɣa ur tezmir ad t-tqid ula deg tgella-s n yal ass, aniɛad adawi, isafaren akked kra n dduzan i t-yessefken. Rny ɣer-s, ula d takalict i t-ilaqen akken ad yessiweḍ ad iḥerrek, alama yerwa aḥebber ed umqellaɛ akken ara as-tt-id-sersen i walmend-is yimḍebbren i terza taluft.
Mhenni Xalifi