Aṭas n yimusnawen i irefden idles n tmurt almi yeweḍ γer tqacuct. Aṭas i yuran γef umezruy, uguren d iγeblan n tmurt akked cbaḥa-s. Ger yemyura agi yella yiwen gar tgejda n tsekla Tazzayrit wagi d Mulud Ferεun, d amyaru azzayri s tutlayt tafransist, isem-is aḥeqqani Mulud At Caεban, ilul i tmurt leqbayel ass n 8 di meγres 1913 deg Tizi Hibel deg At Dwala. ikcem ar uγarbaz amenzu di Tewrirt Musa. Syen yuγal yekcem γer « le college » n Tizi-Wezzu di 1928, anda iykemel amecwar-is leqraya. 1932,rebεa iseggasen mbaεd yewwi-d agerdas, yuγal yekcem γer uγerbaz amagnu di Lzzayer tamanaγt, tama n Buzarriεa asmi yesεa 19 iseggasen di leεmer-is. Labaεda mi yesεedda amzizwer yeffeγ-d s ugerdas n uselmed. Deg useggas n 1935 yesselmed di taddert-is Tizi Hibel. Yuγal d anemhal n uγerbaz n Tewrirt Musa, ssyinna γer uγerbaz n Larebεa n At Yiraten. Aseggas 1960 yuγal d amesweḍ. Mulud Ferεun yumen swayen ixeddem, ticert swayes yettaru qeṭṭiεet, temsed itira. Yettkel aṭas γef tira-s acku yessen amek izarreε awal, yal win arat-yeγṛen yezmer ad yefhem. Mulud Ferεun ikred ger twacult tigellilt, ikred yelḥif d laẓ. Γas aken uguren n yal ass id-yettaf s zdat-s yessaweḍ yelmed deg uγarbaz aṛumi, ilqeḍ-d tamusni zedigen am waman, yugmed di tala tmusni swayes yessew tasekla Tazzayrit, isufeγ-itt-id si ṭlam γer tafat. Tira n Ferεun tcud γer laεwayed tiqbuṛin n tmurt leqbayel, igemmer-d d gayen yelhan, annect-a yesbeggen-it-id deg wengal-is amezwaru » Mmi-s n ugellil. Syen yesbegen-d tudert n twacult tazzayrit di temnaṭ n leqbayel. Ar yidis n wangal agi yura daγen ungalen niḍen » Akal d-idamen », »Ibardan yettalin », »Aγmis »d « Isefra n Si Muḥ U Mḥend. Yesbegen-d miḥyaf yellan ger sin yegduden, agdud azzayri d imawlan n tmurt, d wegdud afransi id-ikecmen s rrṣaṣ d idammen. Rnu yefka-d iḥulfan-is d tmuγli-s γef wayen iḍerrun di tmurt n Lzzayer ledγa di lawan n ṭṭrad.
Ass n 15 meγres 1962,yiwet n terbeεt n l’ OAS tessufeγ-d Mulud Ferεun seg unejmu&epsilon,; rnan-d γur-s 5 n yemdanen niḍen (Σli Ḥamutan, Salaḥ Uld Awdiya, Robert Aimzrt, Marcel Basset d Max Marchand), tsenned-iten γer lḥiḍ, syen akin teqreṣ fell-asen s arṣas tenγaten.
Islam Bessaci