Annect-a yella-d deg ukemmel n wahil n uqeddic i tesɛa d tannumi Tdukkla Mgal Aṭṭan n Ufelluj (myopathie) n Bgayet, i yettwaẓẓan deg Tezmalt, ed ɣef uqerru-ines tamsiwt i yuklalen annuz, ta d Nura Ayt Ɛebderreḥman. Deg yiwen n wulɣu, tella tessawel tdukkla-ya i yimuḍan-is akken ma llan ma tekcem-asen deg ul ad ilin di ttiɛad n uḥewwes i temnaḍt n Tala Xaled deg tɣiwant n Uweqqas, aɣir n Bgayet, s urray n tririt ma d ih, akked uxelles n ssuma tameẓyant, tazamulant, n 200 n yidinaren.
Asihar-a d win yebdan ass n aram 4 deg ɣuct, ad idum alama d 14 n yiwen n wayyur. Deg teɣzi n 10 n wussan ihi, ad izmiren yimeɛḍar-a, i ur nteffeɣ aṭas n tikkal deg useggas, ad farsen tagnit n temlilit akked yimdukkal, imuḍan ed yiɛeggalen n tdukkla, tirzi i teftisin ed ucuccef, tuffɣiwin n yiḍ ɣer yimeḍqan igerrzen, akked wurar daɣen n tigzi, i yetturaǧun ad d-yettwaheggi deg uɣerbaz anda i qeɛɛden iman-nsen, snusuyen. Ilaq ad d-nini dakken ssaramen akk yiɛeggalen n tdukkla-ya ad tili temgerrad ulama cwiṭ temlilit n useggas-a ɣef tinna n yilindi deg Tala n Uɣanim ideg i d-iban ladɣa lexsas ameqqran n waman. Maca tikkelt-a, ɣef wawal n tselwayt n tdukkla i d-nebder, yettwadma ad tili tegnit temgerrad seg waṭas n tamiwin. «Yezmer ad yili usikel n useggas-a deg Tala Xaled yugar winna n yilindi deg Tala n Uɣanib, ladɣa imi amḍiq anda ara neggan yeshel i wawwaḍ, asečču daɣen meqqer. Rnu-yas aman i inuḥen xir n yilindi mi ncaha tiqqit». I aɣ-d-tberreḥ Nura Ayt Ɛebderreḥman.
Deg wussan-a ikennfen, ed tseddarin yessefsayen, tagnit ad tili d tin igerrzen nezzeh i yimdanen-a yuḍnen, i tfekka ed wallaɣ, ma ɛnan tiftisin n Uweqqas i ucuccef ed uttfaci, skud amlaqi-ya asdukklan yettuɣal-d kan yiwet n tikkelt i useggas deg unebdu. Awi-d ukan ad ḥulfun s urtaḥ ed tumert, wid umi d-yemmug wahil n usihar-a. Ad d-nesmekti dakken tidukkla-ya d tin i d-yennulfan 15 n tefsutin ɣer deffir, yettusemma deg useggas n 2001.
Mhenni Xalifi